Mun leiða Fab Lab Reykja­vík

Í tilkynningu segir að hún muni stýra daglegum rekstri smiðjunnar og leiða þverfaglegt teymi hennar. 

„Elín Birna er með meistaragráðu í vélaverkfræði með áherslu á vöruþróun frá Chalmers University of Technology. Hún býr yfir víðtækri reynslu á þróun nýsköpunarlausna sérstaklega á sviði heilbrigðistækni. Síðast hjá Nox Medical þar sem hún vann að þróun tækja fyrir svefnrannsóknir. Þar tók hún meðal annars þátt í þróun og prófunum á frumgerðum, útgáfu hönnunar- og þróunargagna og uppfærslu á notendaprófanaferlum í samræmi við leiðbeiningar FDA.

Áður starfaði Elín Birna hjá Oticon Medical í Svíþjóð við þróun heyrnartækja sem fest eru í bein, og hjá Dentsply Sirona Implants við hönnun og þróun tannskrúfa. Hún hefur einnig starfað hjá Volvo Powertrain þar sem hún vann að CAD‑hönnun á olíu- og kælikerfum,“ segir í tilkynningunni.

Er ráðningin sögð vera liður í því að efla hlutverk smiðjunnar í íslensku nýsköpunarumhverfi, með áherslu á þróun frumgerða á fyrstu stigum og áframhaldandi uppbyggingu STEM-menntunar. 

Um Fab Lab segir að smiðjurnar séu meðal lykilinnviða nýsköpunar á Íslandi og starfi eftir alþjóðlegum gæðaviðmiðum Fab Foundation. „Fab Lab Reykjavík hefur á undanförnum árum stutt tugi nýsköpunarverkefna og gegnir mikilvægu hlutverki í þróun frumgerða. Smiðjan er samstarfsverkefni Fjölbrautaskólans í Breiðholti, Reykjavíkurborgar, Mennta-, og barnamálaráðuneytis og Menningar-, nýsköpunar- og háskólaráðuneytis.“