Láta alla nem­endur sem mega þreyta sam­ræmdu prófin

Ólíkt því sem var áður hafa forsvarsmenn grunnskólanna nú mánuð til að leggja samræmdu könnunarprófin fyrir nemendur og fá skólastjórnendur val um að leggja þau fyrir alla nemendur í fjórða til tíunda bekk, en ber skylda til að láta nemendur í fjórða, sjötta og níunda bekk spreyta sig á prófinu. Í Seljaskóla í Breiðholti í Reykjavík hafa nemendur þegar verið látnir þreyta prófin, 

Jóhanna Héðinsdóttir skólastjóri segir að þar hafi verið tekin ákvörðun um að allir nemendur frá fjórða til tíunda bekk myndu spreyta sig.

„Okkur finnst alveg mikilvægt að fá þessar niðurstöður og við höfum bara faglegan metnað og viljum auðvitað bara sjá hvar við stöndum og ég held að foreldrar vilji það líka og nemendur sjálfir. Þannig að við ákváðum að gera þetta hér, að leggja þetta fyrir í öllum árgöngum þar sem það var leyfilegt.“

Þröngur rammi

Tæknivandræði í gær hafi sett strik í reikninginn í gær en utan þess hafi próftakan gengið vel. Jóhanna segir nemendur rólega yfir prófunum, þar sé upplýsingagjöf til þeirra og foreldra lykilatriði.

„Halda ber til haga að það er auðvitað gefinn þröngur rammi núna og ég segi þröngur af því að við erum auðvitað búin að skipuleggja alls konar viðburði innan skólastarfs áður en það er ákveðið að þetta sé lagt fyrir á þessum tíma. Þannig að okkur liggur svolítið á. Þú veist, jú, við höfum fjórar vikur en hér í mínum skóla til dæmis þá er þarna einn starfsdagur í mars og það eru þemadagar og það er opinn dagur og það eru alls konar viðburðir sem að við erum búin að leggja upp með áður en að ákvörðun um þetta er tekin.“

Gott að hafa meiri fyrirsjáanleika

Heilt yfir séu skólastjórnendur í Seljaskóla sáttir en enn eigi eftir að slípa nokkra vankanta, nefnir Jóhanna sem dæmi að fjöldi nemenda í Seljaskóla sé af erlendum uppruna, í einhverjum tilvikum þurfi að biðja um undanþágu fyrir nemendur frá prófunum en undanþágubeiðnir séu einungis til á íslensku.

„Og þetta er bara fysta atrenna eins og við segjum, nú er kominn aðeins meiri fyrirsjáanleiki, það er búið að taka ákvörðun um hvenær þessi próf verða lögð fyrir næstu þrjú skólaárin og það er bara mjög gott. Af því að þá höfum við bara ennþá betra rými til þess að skipuleggja skólastarf  í kringum það og getum undirbúið okkur vel fyrir þetta. En ég vil samt segja að við undirbjuggum okkur eins vel og við gátum núna og nemendur eru bara nokkuð rólegir, finnst mér, yfir þessu. Þetta er bara verkefni eins og hvert annað hjá þeim.“