Finnst það sárt að mæta ekki skilningi eftir barns­burð

Halldóra Huld Ingvarsdóttir skrifar pistil á samfélagsmiðla þar sem hún segir sýna slæmu reynslu af því að reyna að vinna sér aftur sæti í landsliðinu eftir barnsburð.

Hún fer yfir það hvernig uppgefnar valreglur séu ITRA-listinn en sá listi raðast eftir þremur stigahæstu utanvegahlaupum einstaklinga síðastliðin þrjú ár.

Hún var í öðru sæti á listanum í fyrra en hafði þá eignast barn sex mánuðum fyrir HM og var því ekki valin út frá því. Í ár var valið í hópinn fyrir Evrópumótið. Hún var þá í þriðja sæti á ITRA-listanum en þá var allt í einu gefið út að áherslan yrði núna á stigaskor síðasta sumars en ekki síðastliðin þrjú ár eins og áður.

Óraunhæft að ná því svo stuttu eftir barneign

„Ég hugsaði að fyrst hægt var að horfa fram hjá valreglunum síðast hjá mér væri nú eflaust hægt að gera það aftur núna. Það væri jú óraunhæft að ætla að ég myndi ná inn svo háum stigum stuttu eftir barneignir. Um jólin var ég komin í gott form, hljóp 10 km á mínum langbesta tíma. Það vissu þau. En ólíkt í fyrra vildu þau ekki horfa fram hjá nýja áhersluatriðinu, ekki horfa fram hjá stigaskorun minni rétt eftir fæðingu og meta raunverulega stöðu mína í dag. Ég fékk því ekki sæti í liðinu,“ skrifar Halldóra Huld.

Samgleðst þeim sem voru valin í EM-liðið

„Ég samgleðst þeim sem fengu val í EM-liðið og þau eiga öll sitt sæti skilið. Þetta snýst ekki um sætið heldur vinnubrögðin sem ég tel óréttlát,“ skrifaði Halldóra Huld sem segist hafa verið svekktari að komast ekki í heimsmeistaramótsliðið í fyrra.

„En ég skildi rökin fullkomlega. Áhuginn jókst því bara, ég vildi koma sterkari til baka. Ég hef hins vegar engin rök fengið í ár þrátt fyrir fyrirspurnir. Því voru viðbrögðin önnur en síðast, áhuginn dvínaði mikið,“ skrifaði Halldóra.

Finnst það sárast

„Það er það sem mér finnst sárast. Þess vegna vil ég opna á umræðuna. Mér finnst hún eiga rétt á sér. FRÍ hefur alla jafna unnið flott starf en það verður að vera hægt að gagnrýna það sem betur má gera. Annars verða aldrei neinar breytingar. Valreglur verða að vera skýrar og gefnar út fyrir fram, ekki eftir á. Rök verða að fylgja ef horfa á fram hjá þeim,“ skrifaði Halldóra.

„Það er mikilvægt og krefjandi hlutverk að ganga með barn. Konur sem snúa til baka eftir barneignir eiga að mæta skilningi,“ skrifaði Halldóra en að má lesa allan pistil hennar hér fyrir neðan.