Gefa Gunnari til­gang

Þrír MMA kappar eru nálægt því að taka skrefið í atvinnumennsku í íþróttinni. Allir kepptu þeir á glæsilegu bardagakvöldi Glacier Fight Night í Framheimilinu á dögunum.

Logi Geirsson hefur verið að hasla sér völl í bardagasenunni undanfarin ár og varð nú síðast millivigtarmeistari í Framheimilinu.

Mikael Leó Aclipen hefur mikla reynslu þrátt fyrir unga aldur og vann einnig sinn bardaga á umræddu bardagakvöldi sem og Viktor Gunnarsson sem vann titilbardaga á Glacier Fight Night

„Þetta eru strákar sem eru allir að fara út í atvinnumennskuna. Hvort sem það verður í næsta bardaga þeirra eða á næsta ári. Mikael þurfti að taka sér smá pásu vegna meiðsla og er að koma aftur til baka núna. Sjáum hvað hann vill gera. En að mínu mati eru allir þessir drengir tilbúnir í að fara í atvinnumennskuna,“ segir Gunnar Nelson, atvinnumaður í greininni.

Miklu betri en Gunnar var á sínum tíma

Í Mjölni reyna þessir ungu menn að drekka í sig reynslu Gunnars sem hefur í fjórtán ár staðið á stærsta sviði blandaðra bardagaíþrótta hjá UFC og verið atvinnumaður síðan árið 2007. Seinni ár hefur Gunnar æ meira snúið sér að þjálfun og segir það gefa sér rosalega orku.

„Þetta gefur manni rosalega orku. Hefur gefið mér tilgang líka. Ég hef mikinn áhuga á þjálfun og alltaf haft mikinn áhuga á því að ýta þessari íþrótt upp hér heima. Þegar ég er að fara af stað með minn feril er það eiginlega bara ekki í boði að æfa hér heima fyrir mig. Ég er því mikið úti,“ segir Gunnar og bætir við:

„Markmiðið hjá mér var ekki bara að vera eins góður og ég gat orðið heldur líka að ýta þessari íþrótt upp hér heima. Núna erum við að sjá stráka, sem eru uppaldir hér, sem eru orðnir bara skuggalega góðir. Ef ég má segja það sjálfur þá finnst mér þeir vera miklu betri en ég var á þessum tíma.“