Segir ó­af­sakan­legt að Kristófer spili ekki með lands­liðinu

Kristófer var stiga- og stoðsendingahæstur í liði Vals sem sigraði Keflavík, 85-88, í næstsíðustu umferð Bónus deildar karla á fimmtudaginn. Kristófer skoraði nítján stig og tók þrettán fráköst í leiknum.

„Hann er að komast í sitt gamla form og er búinn að líta ótrúlega vel út,“ sagði Jón Halldór Eðvaldsson í Bónus Körfuboltakvöldi.

„Hugsið ykkur að eiga svona strák sem veitir okkur þetta ár eftir ár. Hann hefur gert þetta með tveimur liðum síðastliðin tíu ár. Hann er geggjaður. Ég elska þennan gæja.“

Kristófer hefur ekki leikið með íslenska landsliðinu undanfarin misseri og var til að mynda ekki með því á Evrópumótinu síðasta haust. Sævar Sævarsson vonar að þeir Craig Pedersen landsliðsþjálfari grafi stríðsöxina.

„Það að hann sé ekki að spila með landsliðinu er eiginlega óafsakanlegt af hálfu þjálfarateymisins. Þjálfarateymið, og að hluta til hann líka, þarf að finna einhverja leið. Ef það þýðir að einhverjir þurfi að vera aðeins minni og beygja sig aðeins undir að koma því í kring verður svo að vera,“ sagði Sævar.

„Við höfum ekki efni á að vera án svona gæja. Ég biðla til þjálfaranna og Kristófers, komiði heim til mín í Keflavík og ég skal gefa ykkur viskí.“

Kristófer ræddi um ágreininginn við Pedersen í viðtali við Vísi síðasta sumar. Þar sagðist hann hafa farið á sáttafund með KKÍ sem engu hafi skilað. Pedersen hafi tjáð Kristófer að hann myndi ekki velja hann aftur í landsliðið meðan hann væri við stjórnvölinn hjá því.

Kristófer segir að Pedersen hafi verið ósáttur við viðtal sem Kristófer fór í við mbl.is sumarið 2024, hann hafi ekki mætt á æfingar með landsliðinu sama sumar og ekki gefið kost á sér í landsliðsverkefni 2022.

Kristófer hefur leikið 52 landsleiki. Sá síðasti kom 22. febrúar 2024 þegar Ísland sigraði Ungverjaland, 70-65.

Innslagið úr Bónus Körfuboltakvöldi má sjá í spilaranum hér fyrir ofan.