Ólafur leggur skóna á hilluna: „Auð­vitað er þetta svo­lítið skrýtið“

„Auðvitað er þetta svolítið skrýtið. Þetta er búið að vera í ferli í smátíma svo maður er búinn að melta þetta hægt og rólega, en þegar maður segir þetta svo upphátt þá er það smásjokk,“ sagði Ólafur þegar hann staðfesti þessar fréttir við Stefán Árna Pálsson í vikunni.

Ólafur, sem er 35 ára, er uppalinn hjá FH en fór ungur út í atvinnumennsku og var snemma kominn inn í A-landsliðið sem hann fór með á fjölda stórmóta, fyrst á EM í Austurríki árið 2010 þegar Ísland vann brons.

Þessi öfluga, rétthenta skytta lék stóran hluta atvinnumannsferilinn með Kristianstad í Svíþjóð, þar sem hann er núna búsettur ásamt fjölskyldu sinni, en hefur einnig leikið í Danmörku, Þýskalandi, Frakklandi og Sviss.

Ólafur ætlaði sér að eiga síðasta tímabil ferilsins með Karlskrona í Svíþjóð í vetur en ekkert varð af því að hann gæti spilað á þessari leiktíð.

„Síðasta sumar fékk ég í bakið. Brjósklos. Ég er búinn að vera að reyna að koma mér aftur inn á völlinn, með misgóðum árangri, en ekki náð að spila neinn leik. Núna þegar síðasti hlutinn á tímabilinu er að renna upp þá sá ég ekki að ég gæti komið með neitt að borðinu, fannst mér. Ég var búinn að ákveða að þetta yrði mitt síðasta tímabil og af virðingu við mig og við liðið þá ákvað ég að kalla þetta gott í stað þess að vera að reyna að þjösnast og þvinga eitthvað fram. Þetta er ágætis tímapunktur,“ sagði Ólafur en nánar er rætt við hann í Sportpakkanum á Sýn í kvöld.