KA-menn fögnuðu eftir rosa­legan leik í Eyjum

KA er einum sigri frá undanúrslitunum eftir 34-33 sigur á ÍBV í Vestmannaeyjum.

Eyjamenn fengu tækifæri til að tryggja sér sigurinn í lokasókn venjulegs leiktíma og fyrstu framlengingu en KA-menn lifðu það af og tryggðu sér síðan gríðarlega mikilvægan sigur í annarri framlengingunni.

Ágúst Elí Björgvinsson átti stórleik í marki KA með 21 skot varin, þar af tvö víti. Hann átti einnig þrjár stoðsendingar fram völlinn.

Einar Rafn Eiðsson var markahæstur hjá KA með átta mörk og Bjarni Ófeigur Valdimarsson bætti við sjö mörkum og sjö stoðsendingum. Magnús Dagur Jónatansson og Morten Linder skoruðu báðir fjögur mörk.

Dagur Arnarsson var markahæstur hjá ÍBV með tíu mörk og Elís Þór Aðalsteinsson skoraði sjö mörk. Petar Jokanovic varði líka vel í markinu eða tuttugu skot.

Næsti leikur fer fram í KA-húsinu en þar geta KA-menn tryggt sér sigur í einvíginu og sæti í undanúrslitunum.

KA-menn byrjuðu leikinn vel, voru með frumkvæðið stærstan hluta fyrri hálfleiksins og voru svo tveimur mörkum yfir í hálfleik, 13-11.

KA-liðið var með þriggja marka forskot um tíma í seinni hálfleiknum en Eyjamenn unnu það upp og komust aftur yfir í stöðunni 24-23.

ÍBV var tveimur mörkum yfir, 26-24, en náði ekki að halda því því Akureyrarliðið skoraði tvö síðustu mörkin í venjulegum leiktíma.

Bjarni Ófeigur Valdimarsson skoraði jöfnunarmarkið en Ágúst Elí Björgvinsson varði lokaskot Eyjamanna og tryggði liði sínu framlengingu.

ÍBV skoraði fyrsta markið í framlengingunni en það var áfram hnífjafnt.

Í lok hennar varði Ágúst Elí víti, Eyjamenn náðu síðan aftur ekki að nýta loksóknina sína og því þurfti að framlengja leikinn aftur.

KA-menn voru sterkari í annarri framlengingunni og eru núna í frábærri stöðu með næsta leik á hinum geysisterka heimavelli sínum.