Kostnaður við útför Davíðs var fimm milljónir króna

Jakob Bjarnar skrifar 27. mars 2026 14:59

Líkmenn voru þeir Haraldur Johannessen, Hannes Hólmsteinn Gissurarson, Þórarinn Eldjárn, Kjartan Gunnarsson, Eiríkur Jónsson, Þórólfur Gíslason, Albert Jónsson, Ólafur Börkur Þorvaldsson, Gunnlaugur Sævar Gunnlaugsson og Ásgeir Jónsson. vísir/vilhelm

Útför Davíðs Oddssonar, sem var gerð frá Hallgrímskirkju 8. þessa mánaðar, var opinber. Samkvæmt upplýsingum frá forsætisráðuneytinu kostaði útförin um 4,9 milljónir króna en þess má geta að Reykjavíkurborg lagði til aðstöðu á Kjarvalsstöðum án gjalds en þar fór erfidrykkjan fram.

Eins og Vísir greindi ítarlega frá var útför Davíðs Oddssonar, fyrrverandi borgarstjóra, forsætisráðherra og ritstjóra Morgunblaðsins, einkar vel úr garði gjör.

Í verklagsreglum forsætisráðuneytisins um opinberar útfarir er slíkar athafnir viðhafðar við andlát forseta Íslands og forsætisráðherra, bæði núverandi og fyrrverandi, að höfðu samráði við fjölskyldu hins látna. Þá getur ríkisstjórn ákveðið, ef svo ber undir í sérstökum tilvikum, að útför fari fram á vegum ríkisins.

Vísir spurði talsmenn ráðuneytisins hvort þar innan dyra væri hægt að gera ráð fyrir því að slíkum útförum fari fjölgandi en var tjáð að eðli máls samkvæmt er ekki hægt að áætla fjölda slíkra athafna á næstu árum. En fram kom að með skýrum verklagsreglum og ferlum er forsætisráðuneytið vel undirbúið þegar kemur að framkvæmd opinberra útfara.

Yfirlit yfir útfarir á vegum ríkisins á lýðveldistímum er eftirfarandi en vert að fram komi að listinn* byggir á leit í málaskrá og á tímarit.is og því gætu tilfellin verið fleiri.

Forsetar

• Sveinn Björnsson (lést í embætti), útför í febrúar 1952

• Ásgeir Ásgeirsson, útför í september 1972

• Kristján Eldjárn, útför í september 1982

Forsætisráðherrar

• Sigurður Eggerz, útför í nóvember 1945

• Ólafur Thors, útför í janúar 1965

• Steingrímur Steinþórsson, útför í nóvember 1966

• Bjarni Benediktsson (lést í embætti), útför í júlí 1970

• Hermann Jónasson, útför í janúar 1976

• Jóhann Hafstein, útför í maí 1980

• Stefán Jóhann Stefánsson, útför í október 1980