Ævintýra­leg sigur­karfa Indiana-stráksins í Mars­fárinu

UConn varð háskólameistari 2023 og 2024 og getur nú unnið titilinn í þriðja sinn á fjórum árum, þökk sé mögnuðum tilþrifum Braylons Mullins gegn Duke í gær.

Síðustu leikirnir í Marsfárinu fara fram í Indianapolis en Mullins, hetja gærdagsins, er frá Indiana.

„Indiana-strákurinn sendi okkur til Indianapolis,“ sagði Alex Karaban sem átti stoðsendinguna á Mullins í sigurkörfunni.

Silas Demary yngri minnkaði muninn í 70-72 af vítalínunni þegar tíu sekúndur voru eftir. Duke fór í sókn og Cayden Boozer fékk boltann við miðjuhringinn þar sem tveir leikmenn UConn sóttu að honum.

Þeir komust inn í sendingu Boozers og boltinn barst til Mullins. Hann sendi hann strax á Karaban sem íhugaði að skjóta en gaf boltann þess í stað aftur á Mullins. Hann lét vaða af tæplega ellefu metra færi og boltinn fór ofan í þegar 0,3 sekúndur voru eftir af leiknum, 73-72.

Fyrstu fjögur þriggja stiga skot Mullins í leiknum í gær geiguðu en það síðasta og mikilvægasta rataði rétta leið. Hann var handviss um að hann myndi hitta.

„Fjandinn hafi það, já. Þú verður að vera með sjálfstraust,“ sagði Mullins sem er á sínu fyrsta ári í UConn.

Duke var með pálmann í höndunum í leiknum í gær og náði mest nítján stiga forskoti í fyrri hálfleik. Þegar rúmar sex mínútur voru eftir var tíu stiga munur á liðunum.

UConn gafst þó ekki upp og Tarris Reed yngri leiddi liðið áfram. Hann skoraði 26 stig, tók níu fráköst, gaf þrjár stoðsendingar, fjögur varin skot og þrjá stolna bolta í leiknum.

Aðeins eitt af fyrstu átján þriggja stiga skotum UConn í leiknum fór ofan í en undir lokin hitnuðu Sleðahundarnir heldur betur fyrir utan.

Í undanúrslitum Marsfársins á laugardaginn mætir UConn Illinois. Í hinni undanúrslitaviðureigninni eigast Arizona og Michigan við.

Ef UConn stendur uppi sem sigurvegari í Indianapolis verður liðið það fyrsta í háskólakörfuboltanum síðan UCLA á 8. áratug síðustu aldar til að vinna þrjá titla á fjórum árum.