„Akkúrat núna þá gæti mér ekki verið meira sama“

Var þetta ekki óþarflega spennandi hérna í lokinn?

„Jú mér fannst það, en þetta er FH-Haukar og litast alltaf í þessa átt einhvernveginn,“ sagði Sigursteinn Arndal, þjálfari FH, eftir að FH tryggði sér sæti í úrslitum.

FH-ingar leiddu nánast allan leikinn en komu sér í erfiða stöðu á lokamínútunum þar sem munaði einu marki á liðunum.

„Ég er bara mjög ánægður með liðið mitt að sýna andlegan styrk. Bæði það að vera algjörlega klárir hérna í byrjun leiks en svo líka halda áfram þrátt fyrir að við værum búnir að koma okkur í verulega erfiða stöðu.“

„Ég er mjög ánægður með framlag leikmanna í dag. Að sjálfsögðu ef maður klippir leikinn þá getum við fundið einhvað en akkúrat núna þá gæti mér ekki verið meira sama.“

FH mætir Val í úrslitunum og býst Steini við alvöru baráttu í þeim leikjum.

„Við notum helgina til þess að hlaða batteríin. Við þurfum svo að undirbúa okkur hrikalega vel, við erum að fara mæta virkilega öflugu liði Vals sem unnu deildina og voru stigi á undan okkur.“

Steini var einnig gríðarlega ánægður með stuðninginn úr stúkunni.

„Ég býst við svaka rimmu en ég er líka mjög bjartsýnn, þú sérð stuðningsmennina sem voru hér í kvöld, það er ekki hægt annað en að spila vel og matcha orkuna þegar þessir FH-ingar fylgja svona vel við bakið á okkur.“