ÍR segir miðil dreifa lyga­sögu um leik­menn

Grétar Áki var aðalþjálfari kvennaliðs ÍR sem hafnaði í 4. sæti Olís-deildarinnar í vetur en féll svo úr leik gegn Fram í fyrstu umferð úrslitakeppninnar. Áður var hann aðstoðarmaður Sólveigar Láru Kjernæsted einn vetur.

Í tilkynningu ÍR um brotthvarf Grétars Áka sagði að hann hefði sjálfur óskað eftir að láta af störfum.

Þetta hefur verið dregið í efa í umfjöllun hlaðvarpsþáttarins Handkastsins sem nafngreindi ákveðna leikmenn liðsins og sagði þá hafa þrýst á stjórn handknattleiksdeildar ÍR að skipta Grétari Áka út, með þeim rökum að hann væri ekki nægilega stórt nafn til að laða til félagsins betri leikmenn. Taldi miðillinn sig hafa nægilega góðar heimildir til að setja þetta í loftið.

Í tilkynningu Kristins Jóhannssonar, formanns handknattleiksdeildar ÍR, í dag segir hins vegar að þetta eigi sér ekki stoð í raunveruleikanum.

„Stjórn handknattleiksdeildar ÍR vill að fram komi að tilgreind atriði sem staðhæft var um í umfjöllun Handkastsins um aðdraganda starfsloka Grétars Áka eiga sér ekki stoð í raunveruleikanum.

Stjórnin stendur heilshugar að baki leikmönnum sínum og telur umfjöllunina hafa verið óvandaða, ómálefnalega og Handkastinu ekki til framdráttar.

Að nafngreina leikmenn og bera á þá ósannaðar ásakanir er mikið ábyrgðarmál. Stjórn handknattleiksdeildar ÍR hvetur fjölmiðla til að sýna aðgát og ábyrgð í umfjöllun sinni, sérstaklega þegar um unga íþróttamenn er að ræða,“ segir í yfirlýsingunni og jafnframt að „allar ákvarðanir er varða þjálfarateymi félagsins eru teknar af stjórn handknattleiksdeildar ÍR. Slíkar ákvarðanir eru teknar með hagsmuni félagsins, leikmannahópsins og framtíð kvennaliðsins að leiðarljósi og eru alfarið á ábyrgð stjórnarinnar.“

Ekki hefur verið tilkynnt um eftirmann Grétars Áka.

Uppfært kl. 14: Arnar Daði Arnarsson, eigandi Handkastsins, segir á Twitter að miðillinn standi við fréttina. Grétar Áki vildi ekki tjá sig um málið.