Víða þurrt en skúrir eða él vestast á landinu

Á vef Veðurstofunnar segir að það verði skúrir eða él vestast á landinu, og einhver él á stangli norðaustantil, en lengst af þurrt í öðrum landshlutum.

„Hiti yfirleitt 1 til 7 stig yfir daginn en í kringum frostmark um landið norðaustanvert. Í nótt má búast við áframhaldandi næturfrosti víða um land, en suðvestantil ætti hiti þó að haldast yfir frostmarki.

Fremur hæg vestlæg eða breytileg átt á morgun. Súld eða dálítil rigning á Suðvestur- og Vesturlandi, annars þurrt að mestu. Heldur hlýnandi.

Á sunnudag er svo útlit fyrir suðvestan golu með súld eða rigningu víða um land, en austanlands ætti að hanga þurrt fram eftir degi,“ segir á vef Veðurstofunnar.

Veðurhorfur á landinu næstu daga

Á laugardag: Vestlæg eða breytileg átt 3-10 m/s. Súld eða dálítil rigning á Suðvestur- og Vesturlandi, annars þurrt að mestu. Hiti 0 til 8 stig að deginum, svalast norðaustantil.

Á sunnudag: Suðvestlæg eða breytileg átt 3-10 og víða súld eða rigning, en þurrt austanlands fram eftir degi. Hiti 1 til 7 stig yfir daginn.

Á mánudag: Vestan og suðvestan 8-15 og stöku skúrir, en léttir til um landið austanvert. Hiti 5 til 11 stig.

Á þriðjudag: Snýst í norðan 8-15 með skúrum eða éljum, en úrkomulítið sunnantil. Hiti 2 til 11 stig, mildast syðst.

Á miðvikudag: Norðlæg eða breytileg átt og skúrir eða él, en lengst af þurrt á Suður- og Vesturlandi. Heldur kólnandi.

Á fimmtudag (uppstigningardagur): Suðaustlæg átt og skúrir, en úrkomulítið norðaustanlands.