Ó­stöðvandi Sinner sló met Djokovic

Sinner hefur fagnað sigri í síðustu 32 leikjum á ATP Masters 1000 mótaröðinni, sem er sú sterkasta í heimi á eftir stórmótunum fjórum. Djokovic vann á sínum tíma 31 leik í röð á mótaröðinni árið 2011.

Hann lagði Andrey Rublev örugglega að velli 6-2, 6-4 á leið sinni í undanúrslit.

Ekkert virðist geta stöðvað Sinner þessi misserin og yfirgnæfandi líkur eru á því að hann vinni Opna ítalska meistaramótið á heimavelli sínum í Róm um helgina.

Eftir það verður stefnan sett á Opna franska meistaramótið en með sigri þar myndi Sinner klára alslemmuna, öll fjögur stórmótin, aðeins 24 ára gamall. 

Sinner þykir sigurstranglegastur á því móti, enda er hann efstur á heimslistanum og ríkjandi meistarinn Carlos Alcaraz er meiddur.

„Ég spila ekki fyrir met. Ég spila bara fyrir mína sögu. Á sama tíma er þetta þýðingarmikið fyrir mig en á morgun mæti ég nýjum andstæðingi [Danil Medvedev] og í öðruvísi aðstæðum að kvöldi til. Núna þarf ég bara að einbeita mér að því. Það tekur á tilfinningarnar að spila á heimavelli,“ sagði Sinner eftir sigurinn í dag.