Snarpur skjálfti fannst á höfuð­borgar­svæðinu

Í tilkynningu frá Veðurstofu Íslands segir að þeim hafi borist fjöldi tilkynninga. Skjálftinn fannst víða á Suðvesturlandi, meðal annars í Hveragerði og á Selfossi. Fréttastofu hefur einnig borist ábending frá Akranesi.

Jarðskjálftahrina hófst á Hellisheiði um klukkan sjö í gærmorgun. Í morgun nálgaðist fjöldi skjálfta 450. 

Halldór Gunnar Þorsteinsson, verslunarstjóri Bónus í Hveragerði, segist hafa fundið vel fyrir skjálftanum sem stóð yfir í um fjórar til fimm sekúndur.

„Ég og samstarfsfélagi minn sátum inni á kaffistofu og það skalf allt. Við héldum að við værum að fara detta í gegnum gólfið,“ segir Halldór.

Engar vörur í versluninni féllu í gólfið og sleppur því starfsfólkið við tiltekina sem því fylgir. Halldór segist ekki hafa fundið fyrir mörgum skjálftum á meðan skjálftahrinan hefur staðið yfir.

Fréttin hefur verið uppfærð.