Týndur í sex daga en komst einn niður af Everest

Þyrluflugmenn voru sendir til að leita að honum en leitin skilaði ekki árangri.

Í frétt BBC segir að hreinsunarteymi hafi séð Dawa nærri grunnbúðunum í morgun og að hann hafi verið fluttur á sjúkrahús til aðhlynningar. Ótrúlegt þykir að hann hafi lifað af en hann mun vera við ágætis heilsu, heilt yfir.

Rúmlega þúsund manns komust á tind Everest á þessu tímabili, sem er það mesta sem vitað er um. Fimm dóu á tímabilinu, þar af þrír menn frá Nepal sem komu að því að undirbúa tímabilið.

Dawa, sem er 52 ára gamall, hvarf þann 29. maí þegar hann var að fylgja hópi niður frá Búðum 4, sem eru hæstu búðirnar á fjallinu. Þá var hann að fylgja breskum og pólskum mönnum niður fjallið og dróst aftur úr.

Breski maðurinn birti í gær myndband þar sem hann sagðist viss um að Dawa væri látinn og rifjaði upp hvernig hann hefði sest niður til að hvíla sig. Chis Thrall, breski maðurinn, segist hafa spurt Dawa hvernig hann hefði það og mun hann hafa svarað á þá leið að hann væri góður og sagt Thrall að halda áfram.

Við það fór Thrall að aðstoða pólska manninn, sem var í basli, en Dawa náði þeim aldrei aftur.

Í samtali við BBC segir Pemba Sherpa, sem stýrði leitinni að Dawa, að hann viti ekki til þess að nokkur maður hafi lifað af að týnast svo hátt á fjallinu áður.

„Það er kraftaverk að hann hafi lifað af einn í sex daga og komist niður af fjallinu.“

Áður en hann fannst á lífi var Damu Sherpa, eiginkona Dawa, búin að segja við fjölmiðla að hún teldi hann látinn. Í samtali við AP fréttaveituna segist hún fyrst hafa heyrt af því að eiginmaður hennar væri á lífi í fjölmiðlum.