Hækka loðnuráðgjöf aftur í um 358 þúsund tonn

Hafrannsóknastofnun lagði í janúar til að til að rúm 197 þúsund tonn af loðnu yrðu veidd á þessu fiskveiðiári. Upphaflega lagði hún til innan við fimmtíu þúsund tonna hámarksafla. Nú er lagt til að upphafsaflamark fyrir loðnu á komandi vetrarvertíð samkvæmt aflareglu strandríkja verði 358.044 tonn, sem er 81 prósenta aukning frá lokaráðgjöf seinasta fiskveiðiárs. Ráðgjöfin fyrir loðnu verður uppfærð fyrir næstu vertíð að lokinni haustmælingu samkvæmt tilkynningu Hafrannsóknarstofnunar. 

Lækkun á þorski og ýsu

Hafrannsóknastofnun ráðleggur eins prósenta lækkun aflamarks þorsks fiskveiðiárið 2026/2027. Fylgir sú ráðgjöf aflareglu íslenskra stjórnvalda. Ráðlagður heildarafli lækkar úr 203 822 tonnum á yfirstandandi fiskveiðiári í 201 674 tonn.

Ekki er gert ráð fyrir að ráðlagður heildarafli þorsks aukist næstu tvö til þrjú árin, en fyrir því eru tvær ástæður samkvæmt ráðgjöf Hafrannsóknarstofnunar. Annars vegar séu árgangar frá 2021 og 2022 metnir undir meðallagi og hins vegar séu árgangarnir frá 2019 til 2021 hægvaxta, sem talið er tengjast minni stofnstærð loðnu undanfarin ár.

„Því er vænt framlag þeirra árganga í lífmassa viðmiðunarstofns minna en fyrir eldri árganga í sama fjölda,“ segir um ráðgjöfina á vef Hafrannsóknarstofnunar.

Hvað varðar ýsu verður aflamark hennar 63 206 tonn, sem er 20 prósenta lækkun á ráðgjöf frá yfirstandandi fiskveiðiári. Lækkunin er komin til vegna þess að stærð viðmiðunarstofns ýsu (45 cm og stærri) hefur minnkað frá því að hann náði hámarki árið 2024. Lækkunin kemur í kjölfar minni nýliðunar árin 2022-2024. Því er ekki búist við að stofninn stækki á næsta ári. Vísbendingar eru um að árgangurinn frá 2025 sé stór samkvæmt tilkynningu Hafrannsóknarstofnunar.

Þá er einnig töluverð lækkun á ráðgjöf fyrir ufsa, eða 16 prósent frá yfirstandandi fiskveiðiári og er nú 49 887 tonn. Samdráttur í ráðgjöfinni í ár er vegna lækkaðs mats á stærð viðmiðunarstofns ufsa (4 ára og eldri).

Hærri ráðgjöf fyrir gullkarfa

Ráðgjöf fyrir gullkarfa er 43 319 tonn eða fimm prósentum hærri en á yfirstandandi fiskveiðiári. Í tilkynningu segir að þessa hækkun megi að hluta rekja til hærri stofnvísitölu að hausti seinustu þrjú ár samanborið við árin þar á undan. Metin stærð árganga gullkarfa frá árunum 2009 til 2016 sé lág og af þeim sökum hafi hrygningarstofn minnkað frá árinu 2018. Vísbendingar séu um aukna nýliðun en ekki er búist við að þeir árgangar skili sér í veiðistofninn fyrr en eftir nokkur ár.

Þá er áfram lagt til að aflamark djúpkarfa verði núll tonn þar sem hrygningarstofninn er metinn undir varúðarmörkum. Ekki er búist við því að stofninn fari yfir varúðarmörk á næstu árum.

Ráðgjöf fyrir grálúðu er nær óbreytt frá fyrra ári, 21 079 tonn. Útlit er fyrir aukningu á stofnstærð á næstu árum vegna aukinnar nýliðunar.

Ráðgjöf um aflamark íslensku sumargotssíldarinnar fyrir komandi fiskveiðiár lækkar um 22 prósent og er 80 307 tonn. Ástæðan er sú að vægi stórra árganga frá 2017 til 2019 í viðmiðunarstofni minnkaði frá fyrra ári og því er stofnstærðin metin minni í ár. Í tilkynningu segir að ekki sé búist við miklum breytingum á stofnstærð á næsta ári. Vandamál tengd bergmálsmælingum árin 2024 til 2025 leiði auk þess til aukinnar óvissu í stofnmati. Ráðgjöfina í heild sinni má nálgast á vef Hafrannsóknastofnunar undir Ráðgjöf.

Verði að huga að rannsóknum

Samtök fyrirtækja í sjávarútvegi segir í tilkynningu um ráðgjöfina að þrátt fyrir lækkun í ráðgjöf fyrir nokkrar af mikilvægustu nytjategundum okkar, þar á meðal þorsk, ýsu, ufsa og síld  samdrátt í ráðgjöf stærstu nytjastofnanna séu jákvæð teikn í ráðgjöf nokkurra annarra stofna. 

„Ráðgjöf fyrir löngu og keilu hækkar um 21% milli ára og ráðgjöf fyrir gullkarfa hækkar um 4,8%. Þá hækkar ráðgjöf fyrir skarkola um 1% og fyrir grálúðu um 0,4%. Mest hækkar ráðgjöf fyrir blálöngu, úr 307 tonnum í 1.898 tonn, sem jafngildir 522% hækkun milli ára. Nýlega hefur verið tekin upp ný stofnmatsaðferð fyrir blálöngu,” segir í tilkynningunni.

Þar segir að áfram þurfi að byggja ákvarðanir um nýtingu fiskistofna á niðurstöðum vísinda

„Niðurstöðurnar undirstrika enn á ný mikilvægi öflugra og vandaðra hafrannsókna. Óvissa um stöðu stofna leiðir óhjákvæmilega til varkárari nýtingar og getur haft veruleg áhrif á verðmætasköpun í sjávarútvegi og þjóðarbúinu öllu. Samtök fyrirtækja í sjávarútvegi hvetja stjórnvöld því til að standa vörð um hafrannsóknir og tryggja að nauðsynlegir fjármunir séu til staðar fyrir rannsóknir og vöktun nytjastofna. Á því hefur orðið misbrestur og úr því þarf að bæta,“ segir að lokum.