Burnham vill taka við af Starmer

Burnham tilkynnti þetta á samfélagsmiðlinum X í morgun eftir að Keir Starmer hafði greint frá því að hann myndi hætta sem leiðtogi Verkamannaflokksins og þar með forsætisráðherra. Starmer mun áfram starfa sem forsætisráðherra þar til nýr leiðtogi Verkamannaflokksins hefur verið kjörinn, líklega í sumarlok.

Tilkynning Burnham kemur ekki á óvart og hefur legið í loftinu um tíma. Mikill þrýstingur hefur verið á Starmer síðustu daga og vikur að segja af sér og dró ekki úr þeim þrýstingi þegar Burnham vann þingsæti í aukakosningu á dögunum sem gerði honum kleift að skora Starmer á hólm.

Í tilkynningu sinni þakkaði Burnham Starmer fyrir sína leiðtogahæfni og vinnu fyrir land og þjóð.

„Ákvörðun hans markar upphafið að leiðtogaskiptum og það er mikilvægt að það ferli einkennist af skipulagi og ábyrgð. Ég býð mig fram,“ sagði Burnham.

Burnham var borgarstjóri Stór-Manchester-svæðisins frá 2017 til 2026 og þótti mjög vinsæll borgarstjóri.

Starmer hefur gegnt embætti forsætisráðherra Bretlands frá júlí 2024 eftir stórsigur Verkamannaflokksins í þingkosningum. Hann tók við forsætisráðherraembættinu af þáverandi leiðtoga Íhaldsflokksins, Rishi Sunak. Starmer tók við leiðtogaembættinu í breska Verkamannaflokknum af Jeremy Corbyn árið 2020.