Tuchel ætlar að halda á­fram hjá Eng­landi þrátt fyrir gagn­rýni

England náði forystu gegn Argentínu í gær á 55. mínútu eftir mark frá Anthony Gordon. Eftir að hafa skorað markið ákvað enska liðið að leggjast einfaldlega í vörn og endaði England að vera aðeins tólf prósent með boltann eftir að hafa náð forystu. Það kom í bakið á þeim þar sem Argentína náði að skora tvö mörk undir lok leiksins og vinna England.

Í staðinn fyrir að England myndi halda áfram að stíga upp á Argentínu, sem virkaði fyrstu 55 mínútur leiksins, lagðist enska liðið niður. Það var ljóst að liðið ætlaði að halda eins marks forystu þegar meira en 30 mínútur voru eftir.

Þegar leið á leikinn gerði Tuchel einnig skiptingar þar sem hann setti þrjá varnarmenn inn á völlinn. Hann tók miðjumann, kantmann og bakvörð út af og því ljóst að hann vildi fjölmenna í vörninni og verja forystuna.

Tuchel hefur verið gagnrýndur eftir leikinn vegna þess að hann lagðist í vörn of snemma í leiknum og gaf Argentínu svigrúm til að sækja. Það hafi kostað England fyrsta úrslitaleik heimsmeistaramótsins í 60 ár.

Reynir að vera bjartsýnn

Í viðtali við Sky Sports eftir leikinn sagði Tuchel að hann væri með samning fram yfir EM 2028 og hann ætlaði að halda áfram. Hann segist horfa bjartsýnisaugum á Evrópumótið þó að það sé erfitt að vera bjartsýnn þessa stundina.

Tuchel var ráðinn sem þjálfari enska landsliðsins í janúar árið 2025. Á þessu ári framlengdi hann samning sinn við landsliðið sem dugir fram yfir Evrópumótið 2028.

England mætir Frakklandi í leik um bronsverðlaun heimsmeistaramótsins á laugardaginn. Þetta er skrítinn leikur þar sem bæði lið eru svekkt yfir því að þurfa að spila leikinn. Tuchel vill þó meina að England geti verið stolt yfir því að komast í tvo undanúrslitaleiki heimsmeistaramótsins á átta árum. England tapaði fyrir Króatíu í undanúrslitum heimsmeistaramótsins í Rússlandi árið 2018.