Widdecombe slegin með hamri tuttugu og einu sinni

Komið var að Widdecombe látinni að heimili hennar í Suðvestur-Englandi þann 9. júlí síðastliðinn.  Áhyggjur vöknuðu þegar Widdecombe mætti ekki til viðtals þann 8. júlí. Það var svo daginn eftir sem garðyrkjumaður kom að henni látinni á eldhúsgólfi heimilisins. Hún var 78 ára gömul. 

Lögregla lýsti því fljótlega yfir að líkur væru á að hún hefði verið myrt. Ástæður morðsins eru enn ókunnar. Málið hefur verið rannsakað sem hryðjuverk.

Tuttugu og átta ára gamall maður, Joshua Kerry, hefur verið handtekinn og ákærður fyrir morðið. Í umfjöllun Reuters er tekið fram að Kerry sé hvítur á hörund. 

Í máli saksóknarans í málinu hefur komið fram að verknaðurinn hafi náðst á öryggismyndavél á heimili hennar. Ákærði kom að húsinu meðan hin látna snæddi hádegisverð og spurði hana hvort hún bæri á sér bankakort eða skilríki. Kerry var íklæddur svörtum hönskum og bar hamar í hendi sér, sem hann huldi fyrir Widdecombe.

Kerry sló hana því næst tuttugu og einu sinni í höfuðið með hamrinum, hrinti henni í gólfið, tók veski hennar og var á bak og brott aðeins tveimur mínútum eftir að hann kom.

Áætlað er að réttarhöld í málinu muni hefjast 8. júní á næsta ári. 

Widdecombe áberandi í bresku þjóðlífi síðustu áratugi

Widdecombe var á stjórnmálaferli sínum þekkt fyrir íhaldssöm viðhorf. Hún hafði á síðustu árum sérstaklega beitt sér í innflytjendamálum. Widdecombe var áfram áberandi í bresku samfélagi eftir að þingferli hennar lauk og var hún meðal annars keppandi í raunveruleikaþættinum Strictly Come Dancing og Celebrity Big Brother. 

Umræður hafnar um öryggi stjórnmálamanna

Morð Widdecombe hefur endurvakið umræður í Bretlandi um öryggi stjórnmála en tveir þingmenn hafa verið myrtir þar í landi á síðustu tíu árum, Jo Cox, þingmaður Verkamannaflokksins, árið 2016 í aðdraganda Brexit-kosningarinnar, og sir David Amess, þingmaður Íhaldsflokksins, árið 2021 af stuðningsmanni Íslamska ríkisins (ISIS). 

Þá vekur hamarsárásin einnig hugrenningartengsl við árás sem gerð var á heimili Nancy Pelosi í október 2022. Nancy Pelosi hefur staðið framarlega í Demókrataflokknum síðustu áratugi og hefur meðal annars tvisvar gegn embætti þingforseta fulltrúadeildarinnar. Pelosi var ekki heima þegar árásarmanninn bar að garði en hann réðst á eiginmann hennar Paul Pelosi, þá 82 ára gamlan. Paul lifð árásina af og var árásarmaðurinn síðar dæmdur til þrjátíu ára fangelsisvistar.