Heldur brasið á­fram á Brazell í Bestu deildinni?

Eini leikur kvöldsins í Bestu deild karla í fótbolta er viðureign Vals og Stjörnunnar á N1-vellinum á Hlíðarenda. Bæði lið hafa verið á fullu í Evrópukeppni en í vandræðum á heimaslóðum og því gríðarlega dýrmæt stig í boði.

Leikurinn hefst klukkan 19.15 og verður í beinni útsendingu á Sýn Sport Ísland.

Bæði félögin hafa skipt um þjálfara í sumar en Jón Þór Hauksson, þjálfari Stjörnunnar, hefur bæði náð í sigur og stig í sínum leikjum en ekki er hægt að segja sömu sögu af kollega hans.

Christopher Brazell tók við Valsmönnum af Hermanni Hreiðarssyni daginn eftir að liðið vann 4-2 deildarsigur á Þórsurum. Hann hefur stýrt Valsliðinu í þremur deildarleikjum síðan en á enn eftir að ná í sitt fyrsta stig sem þjálfari í efstu deild á Íslandi.

Það hefur gengið mun betur hjá Brazell í Evrópukeppninni þar sem liðið sló út bosníska félagið Zrinjski Mostar með því að vinna heimaleikinn 1-0 og gera 2-2 jafntefli í útileiknum.

Brazell er því taplaus í Evrópu en hefur tapað öllum leikjum í deildinni heima.

Valsliðið skoraði sitt fyrsta mark og komst yfir í fyrsta sinn undir stjórn Brazell í síðasta deildarleik en varð á endanum að sætta sig við 3-2 tap á móti Fram.

Áður hafði liðið tapað 1-0 á móti ÍBV og 2-0 á móti FH. Markatalan er því 2-6 í þessum þremur fyrstu leikjum Brazell og stigalaus júlímánuður staðreynd.

Þrátt fyrir þrjá tapleiki í röð er Valsliðið enn í efri hluta deildarinnar en botnliðin hafa aftur á móti nálgast hratt.

Valur er í 5. sæti með 19 stig en það eru jafnmörg stig og hjá liðunum í næstu tveimur sætum fyrir neðan, ÍA og Keflavík.

Stjörnumenn eru í 10. sæti með fimmtán stig og komast einu stigi á eftir Val með sigri. Það eru síðan sex stig á milli Vals og FH sem situr í fallsæti.