Gæti skákað föður sínum: „Þetta verður spennandi“

Íslandsmeistarinn er vel stemmd fyrir mótinu og segir það alltaf jafn gaman að mæta til leiks á Íslandsmótinu. 

Guðrún Brá þekkir það vel að standa uppi sem Íslandsmeistari. Það hefur hún gert fjórum sinnum til þessa eða jafn oft og faðir hennar Björgvin Sigurbergsson gerði á sínum ferli. 

Það kitlar Guðrúnu að sækja fleiri Íslandsmeistaratitla en faðir hennar gerði.

„En það er ekki aðal drifkrafturinn þegar kemur að þessu móti. Auðvitað hefur þetta verið mikið í fjölmiðlum. Við nýtum þetta alveg sem smá banter.“

Mætir til leiks full af sjálfstrausti

Eitt er víst og það er að Guðrún Brá er til alls líkleg á móti helgarinnar. Hún hefur í aðdraganda mótsins unnið bæði Hvaleyrarbikarinn sem og Íslandsmótið í holukeppni. 

„Þetta hefur verið flott sumar. Ég hef verið svolítið mikið hérna heima, er því ekki að koma inn í þetta mót beint að utan. Það hjálpar alltaf smá. Þetta verður spennandi. 

Hún býst við hörku samkeppni.

„Ég held það verði mikil spenna og frábært að sjá hvað það eru margir kylfingar skráðir. Vonandi verður þetta mjög spennandi. 

Það er búið að lengja völlinn aðeins. Það gerir þetta meira krefjandi. Vonandi verður veðrið bara gott við okkur.“

Þolinmæði er lykillinn

Með reynsluna á bakinu veit Guðrún Brá hvað til þarf til þess að verða Íslandsmeistari hún nálgast þetta Íslandsmót eins og hún nálgast hvert annað mót.

„Þetta er langt mót, fjórir keppnisdagar og það getur margt gerst. Ég held að þetta muni snúast um að vera þolinmóð og gera sem fæst mistök.“

Guðrún Brá hefur titilvörn sína á Íslandsmótinu í golfi í dag og á teig klukkan 09:23. Fylgst verður náið með framvindu mótsins hér á Vísi.