Strákarnir byrja Evrópukeppnina á tveimur sigur­leikjum

Íslenska liðið vann leikinn á endanum með tólf stiga mun, 87-75, eftir að hafa verið komið þrettán stigum yfir, 23-10, eftir fyrsta leikhlutann. Norður-Makedóníumenn komu muninum niður í þrjú stig fyrir lokaleikhlutann, 56-59, en íslenska liðið átti frábæran fjórða leikhluta sem strákarnir unnu 28-19.

Sindramaðurinn Hlynur Ingi Finnsson skoraði 17 stig, tók 5 fráköst og gaf 5 stoðsendingar, Stjörnumaðurinn Kormákur Nói Jack var með sextán stig og tólf fráköst og Keflvíkingurinn Davíð Breki Antonsson skoraði sextán stig og tók tíu fráköst.

Það voru fleiri að skila tölum. Valsarinn Atli Freyr Haraldsson Katrínarson var með tíu stig, níu fráköst og fjórar stoðsendingar, Stjörnumaðurinn Marínó Ómarsson skoraði níu stig og liðsfélagi hans úr Stjörnunni, Jón Breki Sigurðarson, var með 8 stig, 7 fráköst og 5 varin skot.

Næsti leikur íslenska liðsins er á móti Sviss í fyrramálið.