Keyrðu yfir Svart­fellinga undir lokin og undanúrslitin bíða

Íslendingar voru fimm stigum yfir, 57-62, fyrir 4. leikhlutann þar sem þeir keyrðu yfir Svartfellinga.

Ísland vann lokaleikhlutann með sautján stiga mun, 29-12, og leikinn með 22 stigum, 69-91.

Valsmaðurinn Atli Freyr Haraldsson Katrínarson átti stórleik fyrir íslenska liðið í dag. Hann skoraði nítján stig, tók tólf fráköst, gaf sjö stoðsendingar, stal boltanum í þrígang og varði þrjú skot. Atli hitti úr sjö af átta skotum sínum utan af velli og skilaði alls 41 framlagsstigi.

Davíð Breki Antonsson skoraði fimmtán stig og Marinó Ómarsson þrettán auk þess sem hann tók níu fráköst. Kormákur Nói Jack skoraði tólf stig og tók átta fráköst.

Í undanúrslitunum á morgun mætir Ísland sigurvegaranum úr leik Bretlands og Bosníu sem hefst klukkan 14:00.