Sá rautt eftir nokkrar sekúndur: „Maður lætur muna eftir sér“

„Ég veit ekki hvort þetta hafi verið sjö sekúndur, en þetta var allavegana í sekúndum talið,“ segir Ólafur í samtali við Vísi um rauða spjaldið sem hann fékk í endurkomu sinni með Kristianstad í gær gegn Ystad í sænska bikarnum.

„Auðvitað er maður hátt uppi og allt það en þetta var bara óheppni. Það kemur maður sem fer í maður og mann sókn á mig og ég rekst í andlitið á honum. Harður dómur kannski að gefa rautt spjald, hefði verið nóg að gefa allavegana tvær mínútur en bara óheppni. Það vantar smá upp á tímasetningar hjá mér, fótavinnu og þar fram eftir götunum. Maður þarf að komast í gang. Það var búið að gefa rautt spjald fyrr í leiknum fyrir svipað brot þar sem farið var í andlit, þeir þurftu að fylgja því eftir. Maður lætur muna eftir sér þegar maður kemur inn á.“

Sannkallaður tilfinningarússíbani.

„Auðvitað eru rosalega mikið af tilfinningum í gangi þarna. Þetta gerist hratt. Það er leikmaður sem meiðist og allt í einu er kallað á mig og mér sagt að fara úr treyjunni. Allt í einu er maður kominn með rautt spjald og sestur upp í stúku. Þetta var ákveðinn tilfinningarússíbani. Síðustu dagar hafa líka verið þannig að við vorum að ákveða hvort við ættum að kýla á þetta eða ekki. Ég get alveg viðurkennt að eftir leikinn í gær, þegar maður var kominn heim eftir allt einhvern veginn, var erfitt að ná sér niður eftir öll viðbrögðin sem maður fékk og svo rauða spjaldið. Var kannski ekki alveg eins og maður hafði hugsað sér. Fyrsti leikurinn á tímabilinu, nú er bara að horfa fram veginn og núllstilla sig.“

Vinur fékk hann til að taka fram skóna

Fyrsti leikur Ólafs í langan tíma en fyrr á árinu hafði hann ákveðið að leggja skóna á hilluna eftir erfitt síðasta tímabil með Karlskrona þar sem að hann spilaði ekkert vegna meiðsla.

Gunnar Steinn Jónsson, fyrrverandi atvinnu- og landsliðsmaður í handbolta og góður vinur Ólafs er kominn inn í þjálfarateymi Kristianstad og hann fékk Ólaf inn á æfingu hjá liðinu en góður Íslendingakjarni er hjá Kristianstad.

Ólafur er vel metinn hjá Kristianstad og varð á sínum tíma margfaldur meistari með liðinu. Eftir vel heppnaðar æfingar var ákveðið að hann yrði hluti af leikmannahópi Kristianstad á tímabilinu. Skórnir komnir af hillunni. 

Gæsahúð og miklar tilfinningar

Ólafur fékk magnaðar móttökur frá stuðningsmönnum Kristianstad í gær. 

„Þetta var ótrúleg upplifun. Ég fékk gæsahúð og var ekki langt frá því að fá tár í augað þegar ég var kynntur inn. Manni hlýnar um hjartarætur við að fá svona móttökur. Mér þykir rosalega vænt um það. Þetta er bæjarfélagið mitt sem ég er búinn að búa í rosalega lengi. Hér þekki ég rosalega mikið af fólki og þykir vænt um þau. Að þau skuli sýna mér þennan kærleik er bara yndislegt. Maður er ótrúlega þakklátur. Þetta var ótrúlega skemmtileg stund fyrir mig og fjölskylduna mína.“

Ólafur, sem er 36 ára, er uppalinn hjá FH en fór ungur út í atvinnumennsku og var snemma kominn inn í A-landsliðið sem hann fór með á fjölda stórmóta, fyrst á EM í Austurríki árið 2010 þegar Ísland vann brons. Stór hluti af hans 15 ára atvinnumannaferli til þessa hefur verið hjá Kristianstad. 

„Maður hefur verið í þessu lengi. Að fólk sýni manni þetta þakklæti er frábært. Að það sé glatt með að ég sé kominn til baka og endi þetta með mínum heimaklúbbi. Sýnir að maður hefur skilið eitthvað eftir sig. Ég er sömuleiðis þakklátur sem IFK Kristianstad hefur gert fyrir mig. Þetta er í báðar áttir.“

Nánar verður farið yfir komandi tíma Ólafs hjá Kristianstad, verkefnið framundan, á miðlum Sýnar fyrir helgi.