Juventus bjargaði stigi í lokin

Bæði lið sóttust eftir því að viðhalda fullkominni byrjun á deildinni eftir að hafa bæði unnið fyrstu tvo leiki sína.

Juventus var töluvert líklegra til þess og var með öll tök í Tórínó dag. Liðið stýrði ferðinni frá A til Ö og fékk nokkur færi í fyrri hálfleik sem fóru forgörðum. Staðan var markalaus í hléi.

AC Milan hefur skorað öll mörk sín í deildinni til þessa í seinni hálfleik leikjanna. Varamenn af bekknum hafa þá skorað eða lagt upp þrjú af þeim fjórum mörkum liðsins fyrir leik dagsins.

AC Milan hafði gott sem ekkert getað þegar Rúben Amorim, þjálfari liðsins, gerði þrefalda skiptingu á 61. mínútu. Meðal þeirra sem komu inn á voru Alphadjo Cissé og Samuel Chukwueze.

Aðeins sjö mínútum síðar átti Chukwueze sendingu á Cissé sem negldi boltann í netið til að koma AC Milan yfir og það með fyrsta skoti liðsins á mark í öllum leiknum.

Algjörlega gegn gangi leiksins komst AC Milan yfir.

Juventus sótti fast að AC eftir markið, líkt og liðið hafði gert stærstan hluta leiksins en útlit var fyrir að gestirnir myndu stela öllum þremur stigunum.

Komið var fram í uppbótartíma þegar fyrirgjöf Teun Koopmeiners frá vinstri fann höfuð miðvarðarins Filippo Gatti sem stangaði boltann í slá og inn.

Juventus bjargaði því stigi og leiknum lauk með 1-1 jafntefli þar sem liðin sættust á jafnan hlut.

Bæði lið eru því með sjö stig eftir fyrst þrjá leikina líkt og Como, tveimur stigum frá Roma og Inter Milan sem eru efst með fullt hús eftir þrjá leiki.