Bald­vin setti metið á EM meiddur og er hættur við HM

Baldvin staðfesti þetta við RÚV en hann hefur verið að glíma við hásinarmeiðsli frá því í byrjun júlí. Meiðslin komu í veg fyrir að hann gæti æft af eðlilegri getu í aðdraganda Evrópumótsins í frjálsíþróttum í Birmingham í ágúst en þar náði Baldvin engu að síður 13. sæti í 10.000 metra hlaupi og setti nýtt Íslandsmet á mögnuðum tíma, eða 28:25,67 mínútum.

„Þetta hafði alveg frekar mikil áhrif á æfingarnar. Ég þurfti að æfa nóg til að halda mér í góðu formi en þetta hélt mér klárlega frá því að komast í mjög gott form. Ég þurfti að vera leiðinlega skynsamur þessar sex vikur fyrir EM,“ segir Baldvin í samtali við RÚV.

Eins og fyrr segir hefur hann nú tekið ákvörðun um að hætta við HM í götuhlaupum, þar sem hann hugðist hlaupa 5 kílómetra hlaup, í Kaupmannahöfn um helgina. Baldvin segir ákvörðunina ekki hafa verið erfiða þar sem meiðslin hafi plagað hann svo lengi.

„Sérstaklega þegar þetta er búið að vera að bögga mig í svona margar vikur. Þá var maður alveg kominn með nóg af því að slást í gegnum þetta. Þannig að ég er nógu skynsamur og veit að þetta er eina leiðin til að koma þessu í lag. Til að geta byrjað aftur að æfa venjulega, að æfa af 100% ákefð. Ég sakna þess að gera það,“ segir Baldvin sem segir skýrt langtímamarkmið hjá sér að komast inn á Ólympíuleikana í Los Angeles árið 2028.