Héldu slysinu leyndu: „Ég er fegin að vera á lífi“

Sænska blaðið Expressen segir það hafa verið sjokk fyrir marga þegar Nielsen greindi frá slysinu á þriðjudaginn. Slysið átti sér stað í ágúst en Nielsen og fjölskylda hennar kusu að tala ekki um það opinberlega strax enda voru þau öll í miklu uppnámi.

Systirin vann hrædd og sorgmædd

Þetta setti Wilmu, tvíburasystir Juliu, í óvenjulega stöðu því aðeins tveimur dögum eftir slysið átti hún að keppa fyrir hönd Svíþjóðar í árlegri frjálsíþróttakeppni gegn Finnum, sem hún og gerði og vann 1.500 metra hlaupið.

„Mér finnst ekki skrýtið að Wilma reyni að æfa og keppa á lokakafla tímabilsins. Ég er bara ánægð að hún skyldi geta keppt og hlaupið svona vel þó að hún hafi auðvitað verið mjög hrædd og sorgmædd,“ sagði Julia við Expressen.

Eins og fyrr segir meiddist Julia alvarlega í slysinu og þó að hún sé komin heim til foreldra sinna, eftir langa dvöl á spítala, getur hún ekki sinnt hversdagslegum hlutum og hvað þá byrjað strax að æfa að nýju.

„Ég er þakklát fyrir að hlutirnir eru að þróast í rétta átt en mér líður alls ekki vel og finn enn mikinn sársauka. Ég má ekki setja neinn þunga á fæturna svo að ég eyði dögunum bara heima.

Ég get ekki gert neitt. Ég get ekki eldað. Svo ég hvíli mig bara, reyni að lágmarka sársaukann og komast í gegnum endurhæfingarferlið skref fyrir skref,“ sagði Julia sem nú þarf að sleppa haustönninni í Chalmers-háskólanum þar sem hún stundar mastersnám. Hún stefnir á að hlaupa að nýju en „fyrst mun ég einbeita mér að því sem læknar og sjúkraþjálfarar segja svo að ég geti gert hversdagslegu hlutina sjálf. Ég veit að ég á langt í land en eftir þetta allt saman er ég fegin að vera á lífi.“