Zverev náði að tryggja Evrópu sigurinn

Fyrsta settið var gríðarlega jafnt og vann Zverev settið í bráðabana. Í seinna settinu náði Zverev að sýna yfirburðina sína og vann það örugglega 6-3. Eftir sigur Zverev fékk lið Evrópu þrettánda stigið sitt sem tryggði liðinu sigurinn og gerði að verkum að Carlos Alcaraz þurfti ekki að spila aftur.

Alcaraz kom Evrópu í forystuna með því að vinna Taylor Fritz í dramatískum leik sem réðst aðeins á lokastigunum. Hefði hann tapað leiknum hefði hann tapað tveim einliðaleikjum í röð í fyrsta skipti í átján mánuði.

Laver-bikarinn er keppni sem er innblásin af Ryder-bikarnum sem er keppt í golfi. Í Ryder-bikarnum mætir sameiginlegt lið Evrópu liði Bandaríkjanna og spilaðir eru leikir innbyrðis. Laver-bikarinn var stofnaður árið 2017 og er haldinn á hverju ári en þar mætir sameiginlegt lið Evrópu liði restarinnar af heiminum.

Lið Evrópu vann fyrstu fjögur skiptin sem mótið var haldið en síðan þá hefur restin af heiminum unnið mótið þrisvar. Evrópa náði ekki að vinna mótið á síðasta ári og því var sigurinn í ár kærkominn. Eftir leikinn var Zverev himinlifandi og vildi fá fleiri mót í tennis þar sem keppt er í liðum.