„Þetta er bara nútímavændi“

Oddur Ævar Gunnarsson skrifar 28. september 2026 13:54

Patrekur Jaime situr ekki á skoðunum sínum frekar en fyrri daginn. Einar Einarsson

Patrekur Jaime segir að áhrifavaldar sem eru að stíga sín fyrstu skref ættu ekki að sækjast eftir samstörfum og segir þá alls ekki þurfa á umboðsmanni að halda. Hann segir að þegar á hólminn sé komið séu áhrifavaldar vörumerki sem líkja megi við nútímavændi.

Patrekur leggur orð í belg á samfélagsmiðlinum TikTok. Tilefnið er mikil umræða á miðlinum vegna ásakana á hendur Gumma kíró um að umboðsskrifstofa hans Atelier Agency undirbjóði áhrifavalda. Patrekur segist vilja segja sína skoðun á málinu, enda með tíu ár að baki sem áhrifavaldur þó hann sé ekki viss um að skoðunin muni falla í kramið allsstaðar. Hann segir markmiðið ekki eiga að vera í upphafi að fá samstörf.

„Markmiðið þitt ætti að vera að reyna að búa til fylgjendahóp og búa til vörumerki sem þú ert, út af in the end þá eru áhrifavaldar bara vörumerki og þú ert bara að selja þig. Þetta er bara nútímavændi. Þú ert bara að reyna að selja þig. Og þannig virkar þetta, skilurðu. Þannig að þú þarft að byggja upp þinn fylgjendahóp og þitt brand og þinn persónuleika og þinn stíl til að það meiki sens að vera með einhver svakaleg samstörf. Sorrí.“

Hann segir að ráð númer tvö sé að áhrifavaldar þurfi að setja sjálfa sig í fyrsta sæti. Fylgja sínum vinum eða kunningjum að og halda þétt í sitt fólk. Ekki allir muni setja þína hagsmuni í fyrsta sæti.

„Númer þrjú: Þig vantar ekki umboðsmann. Þegar þú ert nýbyrjaður, bara alls ekki. Ég hef verið hjá tveimur umboðsskrifstofum, ég hef verið með umboðsmann, dýrkað það sko. En þegar þú ert að byrja þá er enginn tilgangur í því út af því, eins og ég sagði, þú átt ekki að vera að sækja þér samstarf.“

Umboðsmaður sé ekki nauðsynlegur fyrr en þú sért kominn á þann stað aað geta rukkað almennilega upphæð fyrir samstörf. Þá geti umboðsmaður nýst vel.

„Þig vantar ekki samstörf með 2.800 fylgjendur. Sorry. En mitt sko trikk, að mínu mati og þetta virkar alls ekki alltaf, er að þú þarft að vera „real“ og þú þarft að vera svolítið á milli tannanna á fólki til þess að fólk nenni að pæla í þér og fylgjast með þér út af því það er „literally“ það sem þetta snýst um. Þú vilt vera „relevant“ og þú vilt að fólk sé að tala um þig út af því að „in the end“ þá er þetta ótrúlega galinn og fáránlegur heimur þar sem fólk er bara að keppast um að fá læk, follows, líta vel út, vera á réttu stöðunum og þekkja rétta fólkið. Þetta er fáránlegt, to be honest.“