Breytt vinnu­brögð sköpuðu núning milli for­stjóra og stjórnar

Breytt vinnubrögð vegna nýrra reglna hafi skapað núning milli forstjóra og stjórnar.

Þetta er meðal þess sem kemur fram í yfirlýsingu stjórnarinnar um starfslok Harðar og aðdraganda þeirra.

Sagt var frá því í byrjun október að Hörður væri að láta af störfum og hefur það verið rakið til þess að hann hafi verið ósáttur við starfshætti stjórnar ríkisfyrirtækisins.

Í yfirlýsingunni segir að Hörður hafi í júní sent minnisblað til stjórnarinnar þar sem hann hafi lagt fram athugasemdir við stjórnarhætti. Þær athugasemdir hafi verið teknar alvarlega, farið hafi verið yfir þau tilvik sem Hörður nefndi sérstaklega og mun stjórnin hafa leitað til óháðra lögfræðinga og fengið álit þeirra. Þar að auki hafi stjórnin haft til hliðsjónar annað lögfræðiálit sem Hörður aflaði.

Stjórnin segir niðurstöðu þessa hafa verið skýra.

„Niðurstaðan er skýr: Yfirferð málsins hefur ekki leitt í ljós að stjórn Landsvirkjunar hafi farið út fyrir lögbundið hlutverk sitt eða heimildir. Ágreiningur hefur hins vegar verið um vinnubrögð og túlkun á hlutverkum stjórnar, stjórnarformanns og forstjóra.“

Nýar reglur + breytt vinnubrögð = núningur

Stjórnin ítrekar að samskipti Landsvirkjunar við fjármála- og efnahagsráðuneytið séu á forræði hennar. Frá því stjórnin var mynduð í apríl 2025 hafi níu sinnum verið fundað með starfsmönnum ráðuneytisins og fundargerðir um þá fundi liggi fyrir og þeir hafi að mestu snúist um arðsemi, arðgreiðslur, fjármagnsskipan og störf stjórnar.

Hörður eða staðgengill hans hafi setið þá fundi þar sem málefni tengd rekstri Landsvirkjunar hafi verið rædd.

Stjórnin sem nú situr er sú fyrsta sem er skipuð samkvæmt nýjum reglum um val í stjórnir stærri ríkisfyrirtækja. Í yfirlýsingunni segir að áhersla hafi verið lögð á skýra verkaskiptingu, góða stjórnarhætti og annað, sem hafi í einhverjum tilvikum kallað á breytt vinnubrögð.

Það hafi skapað núning milli forstjóra og stjórnar.

„Stjórnarmenn eru sjálfstæðir í störfum sínum og einhuga í afstöðu sinni til þeirra athugasemda sem komið hafa fram. Fundargerðir staðfesta að ríkið hefur á engan hátt haft óeðlileg áhrif á stjórnun félagsins. Ákvarðanir stjórnar eru teknar á stjórnarfundum, á viðskiptalegum forsendum og með hagsmuni Landsvirkjunar að leiðarljósi.“

Segjast engin afskipti hafa haft

Í yfirlýsingunni segir einnig að Herði hafi ekki verið haldið frá umræðu um rekstur félagsins. Á því eina og hálfa ári síðan stjórnin var skipuð hafi tvisvar sinnum verið fundað án hans, þegar fjallað var um athugasemdir hans við störf stjórnarinnar.

Hann hafi vikið af tveimur öðrum fundum sem vörðuðu hann sjálfan, eins og við eigi í slíkum tilfellum.

„Stjórn hefur lögbundið hlutverk um eftirlit með störfum forstjóra. Til að sinna því hlutverki er eðlilegt að hún ræði þau mál án hans viðveru.“

Þá segir stjórnin að ekki hafi verið höfð afskipti af daglegum rekstri Landsvirkjunar. Í fáum tilfellum þar sem hún var í samskiptum við ytri aðila eða starfsfólk, hafi það verið gert í samráði við Hörð og með samþykki hans.

Í yfirlýsingunni segir enn fremur að stjórnin hafi orðið við ósk Harðar um starfslok. Landsvirkjun hafi notið þekkingar hans og reynslu um árabil og árangur félagsins á þeim tíma tali sínu máli.

„Landsvirkjun er ein verðmætasta eign þjóðarinnar og eðlilegt að fólk hafi skoðanir á málefnum fyrirtækisins. Engar ákvarðanir eru hafnar yfir gagnrýni og sjálfsagt að ræða vinnubrögð á málefnalegan hátt. Það er hins vegar ekki rétt að halda því fram að vikið hafi verið frá lögum eða góðum stjórnarháttum. Slíkar fullyrðingar samrýmast ekki gögnum málsins og því telur stjórnin rétt að leiðrétta þær. Hún mun áfram vera sjálfstæð í störfum sínum og starfa af fagmennsku með langtímahagsmuni Landsvirkjunar og samfélagsins að leiðarljósi.“