Átrúnaðargoð fótboltahipstersins

Sú var tíðin að fótboltahipsterinn tilbað Argentínumanninn Marcelo Bielsa sem hefur undanfarin aldarfjórðung heillað þenkjandi (og stundum svolítið tilgerðarlega) fótboltaáhugamenn með nálgun sinni á leikinn.

Fótboltaheimspeki Bielsa, sem byggir á hröðum sóknarfótbolta og stanslausri hápressu, er gríðarlega áhrifamikil en meðal tilbiðjenda Argentínumannsins eru ekki ómerkari þjálfarar en Pep Guardiola, Diego Simeone og Mauricio Pochettino.

Fræg er sagan þegar Guardiola heimsótti Bielsa eftir að hann var ráðinn þjálfari Barcelona. Hann vildi læra sjö sekúndna pressu Bielsa og gekkst undir 17 klukkustunda samfellt námskeið í þeim fræðum. Þeir borðuðu nautakjöt og töluðu um fótbolta í tæpan sólarhring. Með Bielsa-fræðin að vopni vann Guardiola 14 stóra titla með Barcelona á fjórum árum.

Þó Spánverjinn hafi náð undraverðum árangri á sínum tiltölulega þjálfaraferli kallar Guardiola læriföður sinn Marcelo Bielsa besta þjálfara í heimi.

En nú er fótboltahipsterinn búinn að finna sér nýtt átrúnaðargoð; Pavel Vrba sem skaust upp á stjörnuhiminn fótboltans með mögnuðum árangi sem hann náði sem þjálfari Viktoria Plzen í Tékklandi.

Hinn 51 árs gamli Vrba á auðvitað langt í land með að verða jafn vinsæll og áhrifamikill og Bielsa en hann er enn mest spennandi þjálfarinn í bransanum. Og hann er staddur hér á landi og mun stýra tékkneska landsliðinu gegn því íslenska í undankeppni EM 2016 á Laugardalsvellinum í kvöld.

Sá eini semkom til greina í starfið

„Hann er í miklum metum og er aðallega vinsæll vegna árangursins sem hann náði með Viktoria Plzen,“ sagði Karel Häring, tékkneskur blaðamaður, í samtali við Vísi í gær en hann er mættur til að fylgjast með leiknum í kvöld sem er gríðarlega mikilvægur upp á framhaldið í riðlinum að gera.

Sjá einnig: Nokkrir leikmenn tékkneska liðsins verið duglegir að skemmta sér.

Häring segir að Vrba hafi verið fyrsti valkostur almennings í Tékklandi sem næsti landsliðsþjálfari eftir erfiða tíma undir stjórn Michals Bílek: „Forveri hans var mjög óvinsæll þegar hann hætti en leikstíll hans var mjög varnarsinnaður. Almenningur vildi fá Vrba í starfið og hann var sá eini sem kom til greina.“

Það gekk þó ekki þrautalaust að fá Vrba lausan frá Viktoria Plzen en skilnaður hans við félagið var nokkuð erfiður, aðallega vegna ósættis stjórnar Viktoria Plzen og Miroslav Pelta, forseta tékkneska knattspyrnusambandsins.

Málið leystist þó að lokum; tékkneska sambandsins nýtti sér klásúlu í samningi Vrba og borgaði samning hans við Viktoria Plzen upp.

Jó-jó liðið sem varð að tvöföldum meisturum

Stuðningsmönnum Viktoria Plzen rann þó fljótt reiðin enda var árangurinn sem Vrba náði með liðið einstakur. Þegar hann tók við Viktoria Plzen árið 2008 hafði félagið aldrei unnið neitt og var þekkt sem hálfgert jó-jó lið sem flakkaði milli tveggja efstu deildanna í Tékklandi.

Þegar Vrba yfirgaf félagið fimm árum síðar var það tveimur meistaratitlum og einum bikarmeistaratitli ríkari, hafði tvisvar komist í riðlakeppni Meistaradeildar Evrópu og náð góðum árangri í Evrópudeildinni.

Það var ekki einungis að Viktoria Plzen hefði náð árangri heldur var það hvernig þeir náðu honum; með skemmtilegum og aðlaðandi sóknarfótbolta sem hreif fólk.

Enda fjölgaði áhorfendum á Doosan Arena í Plzen umtalsvert meðan hann var við stjórnvölinn hjá félaginu. Á fyrsta tímabili Vrba mættu rétt rúmlega 4000 manns á leiki en þegar hann fór var talan komin upp í 10.000.

Og það var hans gamla heimavelli, Doosan Arena, sem Tékkar unnu Íslendinga með tveimur mörkum gegn einu 16. nóvember í fyrra.

Heimir er hrifinn

Það er eina tap íslensku strákanna í undankeppninni til þessa og Tékkar hafa einir liða náð að skora á íslenska liðið.

Það mátti vissulega ekki muna miklu að sigurinn endaði Íslands megin - Jón Daði Böðvarsson skoraði afar slysalegt sjálfsmark og í stöðunni 2-1 í seinni hálfleik svo skaut Gylfi Þór Sigurðsson í stöngina og Petr Cech varði frá Jóhanni Berg Guðmundssyni í dauðafæri - en Tékkar voru sterkari aðilinn. Það viðurkenndu bæði leikmenn og þjálfarar íslenska liðsins.

Sjá einnig: Betur tilbúnir en síðast.

Vrba setti leikinn frábærlega upp og Heimir Hallgrímsson, annar þjálfara Íslands, var ófeiminn að hrósa kollega sínum á blaðamannafundi þegar landsliðshópurinn var tilkynntur í síðustu viku: „Þjálfari Tékka er mjög taktískur. Ég er ekkert feiminn við að lýsa hrifningu minni á honum. Hann setur alltaf upp eitthvað nýtt.“

Varnarleikurinn er spurningarmerki

Stíf pressa er eitt af því sem einkennir leikstíl liða Vrba en Íslendingar voru í vandræðum með að leysa pressu Tékka í fyrri leiknum. Vrba stillir jafnan upp í leikkerfið 4-2-3-1 og leggur áherslu á lið sín haldi boltanum og spili hraðan og beittan sóknarleik, ekki ósvipað og Bielsa gerir.

Varnarleikur Tékka er þó ákveðið spurningarmerki en þeir hafa ekki enn haldið hreinu í leik síðan Vrba tók við. Þá voru þeir stálheppnir að ná jafntefli gegn Lettum í undankeppninni í mars og töpuðu svo fyrir Slóvakíu í vináttulandsleik. Það eru því sóknarfæri fyrir íslenska liðið í kvöld.

Sjá einnig: Erum með lausnir fyrir Eið Smára.

Vrba er opinn persónuleiki og hrífur fólk með sér. Og það sem mikilvægast er, þá kaupa leikmenn aðferðir hans. Vrba er á hraðri leið upp metorðastigann og nú þegar hann er farinn ná góðum árangri með tékkneska landsliðið berst hróður hans víðar en áður.

Nú eru það ekki bara Tékkar og fótboltahipsterinn sem þekkir til hans, heldur einnig hinn almenni fótboltaáhugamaður. Og það er ekki að ástæðulausu - Pavel Vrba er skrambi góður í því sem hann gerir.