Afkomumet hjá Íslandsbanka

Íslandsbanki hagnaðist um 6,8 millljarða króna fyrstu sex mánuði ársins. Bankinn skilaði rúmum 2,2 milljörðum í hagnað á öðrum ársórðungi. Hagnaður af reglulegri starfsemi á fjórðungi hefur aldrei verið meiri, en verulegur söluhagnaður var af fyrsta ársfjórðungi af sölu hlut í Straumi fjárfestingarbanka. Afkoman er um hálfum milljarði betri á fjórðungnum en greiningardeildir hinna bankanna tveggja höfðu spáð. Vöxtur er á öllum sviðum í starfsemi bankans. Þannig uxu þóknunartekjur um sextán prósent og sama gildir um hreinar vaxtatekjur. Bjarni Ármannsson, forstjóri Íslandsbanka, er sáttur við rekstrarniðurstöðu fyrri árshelmings. "Öflugur innri vöxtur hefur verið í efnahag bankans og þóknunartekjur hafa aukist umtalsvert. Samþætting trygginga og bankaþjónustu hefur gengið vel og er áfram unnið að þeim sóknarfærum sem hún skapar. "Bankinn greiddi 2,3 milljarða í arð og lækkaði hlutafé um fjóra milljarða. Þrátt fyrir þetta er hefur eigið fé vaxið um ellefu prósent og er rúmir 33 milljarðar króna. Erlend útlán bankans eru í vexti og nema nú 22 prósent af heildarútlánunum. "Samhliða vexti innanlands verður eitt helsta verkefni okkar á síðari helmingi ársins að auka enn frekar eignir og tekjur bankans utan Íslands," segir Bjarni. Bankinn hefur að undanförnu unnið að eflingu erlendrar starfsemi og er tekna vegna þjónustu og útlána til erlendra aðila farið að gæta í uppgjörinu. Efnahagur Íslandsbanka er traustur og nýtur bankinn besta lánshæfismats íslenskra banka og lánskjara samkvæmt því. Útlán bankans námu í lok tímabilsins 370 milljörðum króna og jukust um 17,5 prósent. Framlag á afskriftarreikning hækkaði miðað við í fyrra og má að mestu rekja það til vaxtar útlána. Heildareignir bankans voru 521 miiljarður króna. Greiningardeildir bankanna segja frávik í spám einkum skýrast af hærri vaxtamun hjá bankanum og betri afkoma af tryggingastarfsemi Sjóvár