Íkveikja á Blönduósi

Kveikt var í atvinnuhúsinu sem brann á Blönduósi aðfaranótt þriðjudags. Tæknideild lögreglunnar í Reykjavík rannsakaði brunarústirnar og komst að þessari niðurstöðu. Enginn er grunaður um verkið að svo stöddu og er rannsókn málsins á frumstigi. Talið er að tjón af völdum eldsins nemi ríflega hundrað milljónum króna. Þrjú fyrirtæki voru með starfsemi í þeim hluta hússins sem brann: matvælaverksmiðjan Vilkó, pakkhús kaupfélagsins og Bílaþjónustan. Lögreglan á Blönduósi óskar eftir því að allir sem búi yfir vitneskju um mannaferðir við húsið nóttina sem það brann eða hafi einhverjar upplýsingar um málið hafi samband við lögregluna í síma 455 2666.