Neyðaraðstoð sinnt að norðan

Næsta föstudag verða opnuð ný þjónustuborð Neyðarlínunnar á Akureyri sem sinnt verður af slökkviliði og lögreglu nyrðra. Eftir breytinguna verða fjögur þjónustuborð staðsett á lögreglustöðinni í Þórunnarstræti á Akureyri, tvö í umsjá lögreglu og tvö sem slökkviliðið mannar. Lögreglu- og slökkviliðsmenn frá Akureyri verða í þjálfun í Reykjavík vegna þessa núna um helgina, að sögn Erlings Júlínussonar, slökkviliðsstjóra á Akureyri. "Eftir breytinguna verðum við komnir með aðkomu og hlutdeild í þessari vinnu," sagði hann, en bætti við að sá sem hringdi inn ætti ekki að finna á því nokkurn mun hvort svarað væri á þjónustuborði í Reykjavík eða á Akureyri. Starfsmenn á þjónustuborðunum fyrir norðan sinna símsvörun fyrir allt landið, rétt eins og gert er í Reykjavík. "Hins vegar verður hægt að vísa á okkur verkefnum, svo sem þjónustu við vettvang sem er hér fyrir norðan," segir Erling og nefnir sem dæmi að stundum þurfi að ræsa út fólk frá vatns- eða rafmagnsveitum, eða kalla til lækna, í tengslum við eldsvoða og önnur slys. "Við verðum þá hluti af þeirri afgreiðslu, að þjónusta vettvanginn," sagði Erling og kvaðst hlakka til aukins samstarfs við starfsfólk Neyðarlínu.