Alvarlegt bílslys í Þjórsárdal

Alvarlegt bílslys varð í Þjórsárdal á veginum skammt frá afleggjaranum að Skriðufelli fyrir liðlega klukkustund. Þá valt sjö manna jeppi og segir lögregla á Selfossi að hann hafi verið fullur af erlendum ferðamönnum. Fyrstu upplýsingar lögreglu eru að þrír eða fjórir mannanna séu mikið slasaðir. Tveir lögreglubílar og tveir sjúkrabílar eru á vettvangi og þyrla Landhelgisgæslunnar er rétt í þann mund að lenda á slysstað til að sækja slasaða fólkið. Lögregla hefur ekki enn nákvæmar upplýsingar um tildrög slyssins eða hversu margir hafi slasast í bílveltunni.