Réðust inn á ritstjórnarskrifstofu

Þrír menn réðust inn á ritstjórnarskrifstofu DV, gripu einn blaðamann hálstaki og gerðu síðar tilraun til að bakka á annan blaðamann þegar þeir voru á leiðinni frá húsinu aftur. Mennirnir kröfðust þess að fá að tala við annan ritstjóra blaðsins en brugðust hinir æstustu við þegar þeim var sagt að hann væri ekki viðstaddur og þeir beðnir um að fara. Blaðamaður sem sagði þeim að ritstjórinn væri ekki viðstaddur og benti þeim á að panta viðtal við hann í afgreiðslunni var tekinn hálstaki. Þá var hringt á aðstoð lögreglu. Þremenningarnir héldu hins vegar á brott áður en lögregla kom og hentu ýmsum gögnum á nærliggjandi borðum á gólfið. Nokkrir blaðamenn fóru á eftir þeim til að taka niður númer á bíl þeirra og sjá hvert þeir færu. Þá bökkuðu mennirnir á miklum hraða í átt að blaðamanni sem varð að forða sér til að verða ekki fyrir bílnum.