Silja hlýtur verðlaun Jónasar Hallgrímssonar

Silja Aðalsteinsdóttir, rithöfundur, hlaut í dag verðlaun Jónasar Hallgrímssonar árið 2004 fyrir starf sitt í þágu íslenskrar tungu. Verðlaunin eru veitt í tilefni af degi íslenskrar tungu, sem er í dag. Verðlaunin eru 500 þúsund krónur og ritsafn Jónasar Hallgrímssonar í skinnbandi.  

Í rökstuðningi ráðgjafarnefndarinnar sem valdi Silju segir: „ Silja hefur lengi sinnt íslenskri tungu og menningu af dugnaði, metnaði og alúð. Árið 1981 kom út eftir hana íslensk barnabókmenntasaga, sú eina sem skrifuð hefur verið hér á landi og mikið brautryðjendaverk en þar er fjallað um íslenskar barnabækur 1780-1979.

Silja vakti mikla athygli ungs fólks fyrir bók sína um Bubba árið 1990 en eitt merkasta rit hennar er án efa ævisaga Guðmundar Böðvarssonar en fyrir þá bók hlaut hún Íslensku bókmenntaverðlaunin árið 1994. Silja var ritstjóri Tímarits Máls og menningar á miklum blómatíma þess. Þegar til stóð að leggja niður TMM í fyrra tók hún það upp á arma sína og sér nú ein um að koma því út. Silja hafði í allmörg ár umsjón með menningarsíðum DV og var í forsvari fyrir menningarverðlaunum blaðsins. Hún skrifaði sjálf fjölda greina og sinnti gagnrýni. 

Umfjöllun blaðsins um menningarmál vakti athygli langt út fyrir lesendahóp blaðsins og hafði mikil áhrif á umræðu í landinu. Silja hefur verið barnabókaritstjóri, afkastamikill þýðandi og er afbragðs upplesari. Einkennandi fyrir allt hennar starf er víðsýni, frjó hugsun og, umfram allt, smitandi áhugi."