Svipað og í nágrannalöndunum

Reglur um íslenska lífeyrissjóði eru sambærilegar við þær sem gilda um lífeyrissjóði í löndunum í kringum okkur og fjármálakerfið hér á landi er vel í stakk búið að taka á hugsanlegum vandamálum sem upp kunna að koma. Þetta er mat Tryggva Þórs Herbertssonar hagfræðings. Tryggvi vann skýrslu um stjórnun lífeyrissjóða fyrir Landssamtök lífeyrissjóða. Þar ber hann stjórnkerfið í íslensku lífeyrissjóðunum saman við það sem gerist á hinum Norðurlöndunum, Bretlandi, Írlandi og Hollandi. Niðurstaðan er sú að í stærstum dráttum eru reglur og starfsvenjur sambærilegar við það sem gerist í samanburðarlöndunum. "Það eru ekki meiri eða minni kröfur gerðar til stjórnarmanna hér en annars staðar og þar sem eru starfsgreinalífeyrissjóðir eins og er hér á Íslandi þá er það yfirleitt þannig að samtök atvinnurekenda og launþega skipta með sér stjórninni," segir Tryggvi. Í skýrslu sinni bendir Tryggvi á þann vanda sem skapast getur í stjórnun lífeyrissjóða starfsgreina þegar bæði stjórnendur og starfsmenn vilja að lífeyrissjóður fjárfesti í fyrirtækjum innan greinarinnar sem eiga í rekstrarerfiðleikum. Þetta þykir bæði stjórnendum og starfsmönnum tryggja hagsmuni sína til skamms tíma en með slíkum ákvörðunum er gjarnan horfið af þeirri braut að tryggja sem besta ávöxtun fyrir sjóðsfélaga. Tryggvi segir að lífeyrissjóðir komist ekki upp með slíkar ákvarðanir nú til dags á Íslandi. "Menn komast ekki upp með þetta. Fjármáleftirlitið hefur mjög gott og virkt eftirlit með þessu," segir hann. Í Hollandi hefur löggjafinn gert kröfu um að í stjórnum lífeyrissjóða sé til staðar lágmarksþekking á ýmsum sviðum sem snerta ákvarðanatöku. Hér á landi eru engar slíkar reglur í gildi en Tryggvi telur rök fyrir því að herða megi kröfur til þeirra sem sitja í stjórnum lífeyrissjóða. "Mér finnst að með flóknara fjármálaumhverfi þá sé æskilegt að við gerum einhverjar frekari kröfur um að stjórnir lífeyrissjóða hafi samanlagða þekkingu sem nær yfir þetta. Þar er ég að tala um lagalega þekkingu, fjármálaþekkingu og fleira í þeim dúr. Það þurfa ekki allir stjórnarmenn að hafa slíka þekkingu en hún þarf að vera til staðar," segir Tryggvi.