Fólk ætti að fá að brugga

Leyfa verður fólki að framleiða léttvín og líkjöra, sagði Guðjón Arnar Kristjánsson, formaður Frjálslynda flokksins, á þingfundi Alþingis í gær. Guðjón, ásamt þingmönnum úr öllum flokkum Alþingis utan Framsóknarflokksins, er flutningsmaður frumvarps um breytt áfengislög. "Ég tel að þarna sé eftir þó nokkru að slægjast," sagði Guðjón. Verði heimilt að brugga komi þekking og hæfileikar fólks til framleiðslu íslenskra vína upp á yfirborðið. Það geti leitt til atvinnurekstrar á því sviði í framtíðinni.