Ekki vitað hversu mikið tjónið er

Vatnið á götum Hafnar í Hornafirði sjatnaði mikið í nótt eftir eina mestu úrkomu og vatnselg í manna minnum þar í bæ í gær. Ekki liggur fyrir hversu mikið tjónið varð í flóðunum. Gríðarleg úrkoma var á Höfn frá því á föstudagsmorgun og þar til í nótt og réð fráveitukerfi bæjarins engan veginn við vatnselginn. Auk þess var háflóð við bæinn um hálffjögur í gær og dró það úr rennslinu í fráveitukerfinu. Samkvæmt upplýsingum lögreglu á Höfn flæddi inn í á bilinu tíu til fimmtán hús og höfðu bæjarstarfsmenn og slökkvilið í nógu að snúast að dæla vatninu burt. Vatnsyfirborðið náði einum metra þar sem það var hæst í bænum og léku menn sér að því að róa um á bátum um götur bæjarins. Rigningunni slotaði í nótt sem fyrr segir og hefur vatnið sjatnað af sjálfu sér í kjölfarið og er nú orðið vel fært um götur bæjarins. Helgi Már Pálsson, bæjarverkfræðingur á Höfn, segir að það sjáist í allar götur og það sé hætt að rigna. Vatnið hafi sjatnað mikið og aðeins séu smápollar eftir. Helgi segir að hann viti ekki annað en að búið sé að dæla vatni úr öllum húsum sem flætt hafi inn í. Menn hafi verið að til klukkan ellefu í gærkvöld við dælingu og þá hafi þeir séð að hún bæri árangur og að byrjað væri að sjatna á götunum. Aðspurður um skemmdir á húsum í flóðunum segir Helgi ekki sé búið að meta þær nákvæmlega en vitað sé að flætt hafi inn í um 15 hús. Hann biður eigendur að hafa samband við tæknideild bæjarins eftir helgi til þess að hægt sé að kortleggja hvar og hversu mikið tjónið sé.