Nokkuð um umferðaróhöpp í Reykjavík í dag

Nokkuð hefur verið um umferðaróhöpp í Reykjavík í dag, bæði vegna hálku og þess að sól er lágt á lofti. Bíll valt á hliðina við Starengi í Grafarvogi laust eftir hádegi í dag eftir að ökumaður hans hafði misst stjórn á honum og bíllinn runnið á ljósastaur. Að sögn lögreglu voru slys á fólki minni háttar en bíllinn mun vera skemmdur. Lögregla hefur skráð átta árekstra frá því í klukkan sjö í morgun en þeir hafa allir verið minni háttar og engin slys orðið á fólki. Lögregla bendir fólki á að enn sé hálka og hálkublettir á minni götum borgarinnar og því beri að haga akstri eftir aðstæðum.