Sjötti sigur Wigan í röð

Nýliðar Wigan héldu ótrúlegri sigurgöngu sinni áfram í ensku úrvalsdeildinni í dag, þegar liðið vann Portsmouth 2-0 á útivelli. Þetta var sjötti sigur Wigan í röð í deildinni og liðið er nú aðeins sex stigum á eftir toppliði Chelsea og situr í öðru sæti deildarinnar eftir ellefu umferðir, nokkuð sem engan hefði órað fyrir í upphafi leiktíðar.

Franski bakvörðurinn Pascal Chimbonda skoraði eitt mark og lagði upp annað fyrir félaga sinn Jason Roberts, sem áður lék með Portsmouth.