Ölvun á unglingadansleik

Tveir gistu fangageymslur lögreglunnar á Akureyri í nótt og einn var tekinn ölvaður við akstur. Báðir þeir sem gistu fangageymslur voru teknir fyrir ölvun og óspektir, annar þeirra á unglingadansleik í Hlíðabæ.

Nokkuð var um ölvun á unglingadansleiknum og eitthvað um að ungmenni væru að slást. Lögregla þurfti einhver afskipti að hafa af því en að öðru leyti var nóttin að mestu róleg. Nóttin í Reykjavík var óvenjuróleg að sögn lögreglu og þykja menn nú greina að nálægðin við jólin sé farin að segja til sín þar sem föstudagskvöld eru rólegri en oft áður, telja menn það vegna þess að fólk sinni innkaupum meira á laugardögum og að skólafólk sé þá í meiri mæli við vinnu í verslunum. Því verði minna um skemmtanahöld en ella.