Hefur lagt hald á yfir 500 kannabisplöntur á árinu

Lögregla er búin að leggja hald á nokkuð á sjötta hundrað kannabisplöntur á árinu og er talið að næstum allt marijúana, sem neytt er hér á landi, sé framleitt innanlands.

Að sögn Ásgeirs Karlssonar, yfirmanns fíkniefnadeildar lögreglunnar í Reykjavík, finnst marijúana sára sjaldan við tollskoðun þótt tiltölulega auðvelkt eigi að vera að finna það. Það bendi ótvírætt til mjög lítils innflutnings.

Hins vegar hafi götudeild fíkniefnalögreglunnar lagt hald á hátt í kíló af marijúana, sem fundist hefur á fólki á götunni það sem af er árinu, sem bendi til að neyslan sé talsverð. Efnið er unnið úr kannabisplöntum, sem tiltölulega auðvelt er að rækta hér á landi.

Karlmaður á fimmtugsaldri, sem lögreglan á Selfossi handtók í uppsveitum Árnessýslu snemma í gærmorgun eftir að hátt í 200 kannabisplöntur fundust hjá honum, auk nokkurs magns af tilbúnu marijúana, var í gærkvöldi úrskurðaður í allt að sjö daga gæsluvarðhald. Fleiri hafa ekki verið handteknir vegna málsins.

Hins vegar var ekki krafist er gæsluvarðhalds yfir manni, sem Reykjavíkurlögreglan handtók í gær eftir að 65 hassplöntur og eitthvað af unnu efni fundust við húsleit hjá honum í fyrrakvöld, en hann játaði á sig framleiðslu og sölu. Hann er á fertugsaldri og hefur áður gerst brotlegur við lög.

Algengt er að kannabisræktendur leiti sér húsnæðis utan höfuðborgarsvæðisins til starsseminnar og ítrekað berast fréttir af innbortum í gróðurhús þar sem hitalömpum er stolið, en þeir eru einmitt notaðir við kannabis ræktunina.