Breska lögreglan ákærð

Manoel Gomes Perreira, sendiherra Brasilíu í Bretlandi, hefur sagt breskum stjórnvöldum að hann sé undrandi á því að enginn breskur lögreglumaður verði ákærður vegna drápsins á Brasilíu­manninum Jean Charles de Menezes, sem lét lífið af völdum byssukúlna frá breskum lögreglumönnum á jarðlestastöðinni Stockwell í London hinn 22. júlí á síðasta ári.

Fréttastofa bresku sjónvarpsstöðvarinnar BBC skýrir einnig frá því að íbúar í Gonzaga, heimabæ de Menezes í Brasilíu, séu furðu lostnir og reiðir vegna ákvörðunar breska ákæruvaldsins, sem tilkynnt var um á mánudag.

Ákæruvaldið í Bretlandi taldi ekki ástæðu til þess að ákæra lögreglumennina tvo, sem skutu á Menezes, þar sem þeir stóðu báðir í þeirri trú að hann væri sjálfsmorðsárásarmaður með sprengjur innanklæða. Þeir töldu að hann myndi sprengja lestina og valda miklu manntjóni ef þeir kæmu ekki í veg fyrir það með því að skjóta hann.

Ákæruvaldið komst hins vegar að þeirri niðurstöðu að lögreglan, sem stofnun, yrði ákærð fyrir brot á lögum um heilbrigði og öryggi á vinnustöðum vegna þess að henni tókst ekki að tryggja heilbrigði, öryggi og velferð de Menezes.