Ríkisstjórnin krafin svara

Nú, þegar aðeins rúmur mánuður er til þingkosninga í Svíþjóð, kröfðust þingmenn bæði stjórnar- og stjórnarandstöðuflokka þess í gær að ríkisstjórnin skýrði stefnu sína í kjarnorkumálum í kjölfar þess að slökkt hefur verið á helmingi allra kjarnaofna í landinu.

Slökkt var á ofnunum af öryggis- og viðhaldsástæðum eftir atvik sem varð í einu kjarnorkuverinu í síðustu viku, en það þótti sýna að öryggiskerfi kjarnorkuveranna væru ekki eins áreiðanleg og vera ber. Sænsk kjarnorkumálayfirvöld sögðu í gær að ekki stæði til að slökkva á fleiri ofnum og þrátt fyrir að fimm af tíu kjarnaofnum landsins væru ekki í gangi ætti það ekki að valda teljandi röskun á raforkumarkaðnum. Að öllu jöfnu sjá kjarnorkuverin Svíum fyrir helmingi raforkuþarfar sinnar.

Göran Persson forsætisráðherra og aðrir ráðherrar í ríkisstjórninni hafa lítið viljað tjá sig um málið, en stjórnin er bundin af því að árið 1980 var samþykkt í þjóðaratkvæðagreiðslu að Svíar hættu að nota kjarnorku. Nýjustu skoðanakannanir hafa aftur á móti sýnt afgerandi stuðning Svía við að halda í kjarnorkuna. Árið 1997 kynnti stjórnin áætlun um að úrelda alla þá tólf kjarnaofna sem þá voru starfræktir í landinu. Tveimur hefur verið lokað síðan.