Gengi Sony lækkar

Gengi hlutabréfa í japanska hátæknifyrirtækinu Sony lækkaði um 2 prósentustig á markaði í gær og í fyrradag í kjölfar þess að bandaríski tölvuframleiðandinn Dell ákvað að innkalla rúmlega fjórar milljónir rafhlaða fyrir fartölvur á heimsvísu. Um varúðarráðstöfun var að ræða en í sex tilvikum höfðu rafhlöður tölvanna ofhitnað og kviknað í þeim. Rafhlöðurnar, sem Sony framleiddi, voru allar seldar í fartölvum Dell á tímabilinu frá apríl árið 2004 til júlí á þessu ári. Flestar rafhlöðurnar voru seldar í Bandaríkjunum en talið er að um ein milljón rafhlaða hafi verð seld í öðrum löndum. Að sögn talsmanna Sony er ekki vitað hversu mikið innköllunin mun kosta fyrirtækið en sérfræðingar telja að ef fyrirtækið þurfi að greiða kostnað við hverja einustu rafhlöðu af þeim gerðum sem talið er að galla sé að finna gæti hann numið 50 milljörðum jena, jafnvirði um 30 milljarða íslenskra króna. Samkvæmt upplýsingum frá EJS, sem hefur umboð fyrir Dell tölvur á Íslandi, geta fartölvueigendur farið á vefsíðu fyrirtækisins og kannað hvort rafhlaða fartölvu þeirra sé ein þeirra sem geti verið gölluð.