Létu vísa tveimur frá borði

Breskir flugfarþegar neituðu að hleypa flugvél á loft fyrr en tveir karlmenn af asískum uppruna, sem þeir grunuðu um að vera hryðjuverkamenn, yrðu færðir frá borði. Þetta kemur fram á fréttavef breska dagblaðsins Daily Mail.

Mennirnir, sem voru ásamt 150 farþegum á leið til Manchester frá Malaga á Spáni, vöktu grunsemdir farþega með því að klæðast leðurjökkum í heitu veðri og tala saman á tungumáli sem líktist arabísku. Nokkrir farþegar stóðu upp og fóru frá borði og aðrir neituðu að fara um borð fyrr en mennirnir væru fjarlægðir úr vélinni.

"Það voru allir sammála um að þessir menn litu grunsamlega út," sagði einn farþeganna. "Sumir farþegarnir voru mjög óttaslegnir, grétu jafnvel."

Mönnunum var að lokum vísað frá borði af lögreglumönnum. Leitað var að sprengiefni í vélinni en ekkert fannst. Stuttu seinna fór vélin á loft með tveimur færri farþegum.

Rannsókn leiddi í ljós að mennirnir tengdust hryðjuverkasamtökum ekki á nokkurn hátt og var þeim sleppt. Þeir tóku næstu vél til Manchester daginn eftir.