Hafa hrakið vígamenn burt

David Richards, hershöfðingi sem leiðir 20.000 manna herlið NATO í Afganistan, sagði um helgina að aðgerðir sem miðuðu að því að hrekja herskáa talíbana úr fylgsnum sínum í Suður-Afganistan hefðu heppnast vel og væri lokið.

Samkvæmt upplýsingum frá NATO létust um 500 vígamenn talíbana í aðgerðunum sem stóðu yfir í tvær vikur. Þrátt fyrir það voru gerðar tvær sjálfsmorðsárásir á bílalestir á vegum hersetuliðsins í gær. Tveir óbreyttir borgarar létust í árásunum auk þess sem sex hermenn særðust.