Styttist í sveigjanlega tölvuskjái

Hópur verkfræðinga við Cambridge-háskóla í Bretlandi hefur búið til sveigjanlegar og þunnar plötur úr málmblöndu. Vonir eru bundnar við að hægt verði að búa til örþunnan tölvuskjá úr sveigjanlegu efni úr málmblöndunni, sem hægt verður að rúlla upp líkt og blaði.

Þetta eykur líkurnar á því til muna að hægt verði að framleiða tölvuskjái sem hægt verði að brjóta saman, stinga í jakkavasa og lesa til dæmis í strætisvagni á leið í vinnuna.

Vísindamennirnir segja sömuleiðis að með sama efni verði hægt að búa til endurnýtanlegar pakkningar, lyklaborð fyrir tölvur sem hægt verði að rúlla upp og brjóta saman. Þá er horft til þess að málmblönduna megi nota til að búa til neyðarskýli, sem hægt sé að reisa við erfiðar aðstæður.

Dr. Keith Seffen, yfirmaður verkefnisins, líkir plötunni við reglustiku. Þegar hún er beygð mikið myndast mikið álag á einstaka hluta hennar með þeim afleiðingum að hún brotnar. Málmblandan er hins vegar þeim eiginleikum gædd að álag málmplötunnar hennar breytist og því er hægt að beygja hana mikið og jafnvel brjóta saman.

Ekkert hefur verið gefið upp um það hversu langt sé í að upprúllanlegur tölvuskjár líti dagsins ljós.